АҚШ Хитойдан импорт қилинадиган маҳсулотларга божхона таърифларини 245 фоизгача очиради. Бу ҳақда Оқ уй томонидан бугун, 16 апрель куни маълум қилинди. Баёнотда айтилишича, Пекин Қўшма Штатларга галлий, германий, сурма, магнит каби стратегик материаллар экспортини тақиқлаган. Трамп маъмурияти буни АҚШ миллий хавфсизлиги учун таҳдид сифатида баҳоламоқда. Боиси нодир металлар автомобилсозлик, авиация, яримўтказгичлар ҳамда ҳарбий саноат учун ҳал қилувчи аҳамиятга эга.
Оқ уйга кўра, Дональд Трамп 2 апрель куни эълон қилинган янги савдо сиёсатига биноан божхона тарифларини янгилаган. Унинг доирасида Хитойга нисбатан аввалига 54, сўнг Пекиннинг жавоб чораларига қараб 104, 124, 145 фоизли божхона тарифлари жорий қилинган. Бироқ жавоб чоралари кўрмай, музокара олиб бориш истагини билдирган давлатлар учун “90 кунлик танаффус” эълон қилинган.
Хитой АҚШ божхона сиёсатига жавобан тарифларни сўнгги бор 125 фоизгача оширган. Оқ уй мазкур ҳаракатни “қасоскорона чоралар” деб атаб, Хитойдан олиб келинадиган маҳсулотларга бож тарифлари 245 фоизгача кўтарилишини билдирди.
“Президентнинг Америка иқтисодиётини тиклаш сиёсати натижасида 75 дан ортиқ мамлакат янги савдо битимлари бўйича музокаралар бошлаш истагини билдирди. Лекин Хитой бу жараёнда иштирок этиш ўрнига қарши чора кўрмоқда”, дейилади Оқ уй баёнотида.
Тарифлар айнан қандай товарларга татбиқ этилиши ҳозирча очиқланмаган. Аммо кузатувчилар бу ҳолат АҚШ—Хитой савдо урушини янада кучайтириши мумкинлигини таъкидламоқда.
Изоҳ (0)