Россия космосда ядровий қуролни жойлаштиришга интилмоқда, бу эса Ер атрофида айланаётган минглаб сунъий йўлдошларни хавф остига қўйиши мумкин. НАТО бош котиби Марк Рютте шундай баёнот берди.
Россиянинг космосда ядровий қурол жойлаштириш имкониятларини ўрганаётганлиги ҳақида хабарлар бор. Бу бизни жуда ташвишга солмоқда, деди у Welt ам Соннтаг нашрига берган интервьюсида.
Рюттенинг сўзларига кўра, сунъий йўлдошлар НАТО аъзоларининг мудофаасида, жумладан, Украинани Россия тажовузидан ҳимоя қилишда ва одамларнинг кундалик ҳаёти учун муҳим аҳамиятга эга.
У Ер орбитасида, яъни 7000 га яқин қурилма айланаётган ҳудудда космик ядровий қуролни жойлаштириш Москва учун “ўз имкониятларини ошириш” эканини айтди.
Космос худди қуруқлик, денгиз, ҳаво ва кибермакон каби бизнинг тийиб туриш сиёсатимиз ва мудофаамиз учун жуда муҳим, деди НАТО бош котиби.
Бундан ташқари, Рютте альянс томонидан “космосдаги чақириқларга” қарши туриш учун “кичик”, аммо манёврли ва яхши ҳимояланган сунъий йўлдошлар ишлаб чиқилаётганини эслатиб ўтди. Шунингдек, НАТО давлатлари миллий космик қўмондонлик марказларини яратиш устида ишлаётганини айтди. Бу мамлакатлар коинот бўйича разведка маълумотларини алмашмоқда.
Космосда қуролланиш пойгасининг олдини олиш бўйича халқаро келишув 1967 йилда кучга кирган. Уни 114 давлат, жумладан, Россия ҳам имзолаган. Бироқ шартнома космосдаги ҳарбий фаолиятни тўлиқ чекламайди. Келишув танқидчиларининг таъкидлашича, ҳужжат замонавий сунъий йўлдош тизимларидан келиб чиқадиган хавфларни етарлича акс эттирмаслиги мумкин.
АҚШ генерали Майкл Гетлейн аввалроқ Хитой коинотдаги имкониятларини кенгайтириш доирасида Ер орбитасида сунъий йўлдошлар ўртасида “ҳаво жанглари”ни бошлаганини маълум қилганди.
Изоҳ (0)