Агар Европа иттифоқи АҚШдан нефть ва газ сотиб олишни оширмаса, Вашингтон божларни жорий қилади. Бу ҳақда сайланган президент Дональд Трамп Truth Social ижтимоий тармоғида маълум қилди.
“Мен Европа иттифоқига Қўшма Штатлар билан муносабатлардаги улкан тақчилликни бизнинг нефть ва газни кенг кўламли харид қилиш орқали тўлдиришлари кераклигини айтдим”, дейди у.
Трамп “акс ҳолда божлар жорий этилишини” таъкидлади.
Аввалроқ сайланган президент ЕИ билан 300 млрд долларлик савдо тақчиллигидан шикоят қилиб, бутун импортга янги 10-20 фоизли божлар жорий этиш билан таҳдид қилганди. Bloomberg нашри экспертлари Европа иттифоқи ва АҚШ ўртасидаги савдо урушини истисно қилмаган.
Еврокомиссия, шунингдек, Трампнинг бутун Америка импортига 3 триллион долларлик тарифлар белгилаш ҳақидаги ваъдасидан хавотир билдирди. 575 миллиард долларлик Европа автомобиллари, фармацевтика ва бошқа маҳсулотлар зарар кўриши тахмин қилинмоқда.
АҚШнинг Европа иттифоқидаги собиқ элчиси Энтони Гарднернинг таъкидлашича, “Трамп ҳеч қачон Европа иттифоқини тенг суҳбатдош сифатида тан олишдан бунчалик манфаатдор бўлмаган”.
ЕИ дипломатияси раҳбари Кая Каллас Брюсселда бўлиб ўтаётган Евроиттифоқ саммитида агар АҚШ ва Европа иттифоқи савдо урушини бошласа, ягона ғолиб Хитой бўлишини айтган эди. Шунингдек, The Washington Post газетаси Трамп жорий қилмоқчи бўлган тарифлар Европа иттифоқи мамлакатларига жиддий иқтисодий зарар етказиши мумкинлиги ҳақида хабар берган эди.
Бу ҳаракатлар Европа иттифоқи ва АҚШ ўртасидаги муносабатларга салбий таъсир қилади, деб ёзди The Washington Post.
Шу билан бирга, Европа Марказий банки раҳбари Кристин Лагард Европа етакчилари Трамп бошчилигидаги янги Америка маъмурияти билан божлар бўйича ҳамкорлик қилиши, шунингдек, савдо урушига йўл қўймаслик учун Қўшма Штатларда ишлаб чиқарилган маҳсулотларни кўпроқ сотиб олиши керак, деган фикрни билдирганди.
Изоҳ (0)