Франция Мудофаа вазирлиги бригада генераллари Андре Кусту ва Пол Пеллизаррини оммавий баёнотларда бетарафлик ва вазминликни сақлаш мажбуриятига риоя қилмагани учун ҳарбий хизматдан четлатди. Бу ҳақда Frans Press агентлиги хабар бермоқда.
“Икки собиқ генерал “ўзини тута билиш мажбуриятига риоя қилмагани” сабабли лавозимидан бўшатилди”, дейилади агентлик хабарида.
Маълум қилинишича, Кусту 2021 йил 21 апрелда Valeurs Actuelles нашрида эълон қилинган мурожаатга имзо қўйган йигирмата генералдан бири бўлган. Бу мурожаат Шарл де Голл сиёсатига қарши “генераллар фитна”сининг йиллигида чоп этилган эди.
Ушбу ҳужжатда ҳарбийлар мамлакатнинг “парчаланиши”, “муайян ирқчиликка қаршилик” туфайли авж олган “жамоалар ўртасидаги адоват”, шунингдек, “исломофобиялик ва шаҳар атрофидаги тўдалар”ни қаттиқ қоралаган эди. Шунингдек, генераллар “миллатни асраш”га содиқ сиёсатчиларни қўллаб-қувватлашга тайёр эканини, “тарқоқлик” давом этса, “хизматдошларнинг аралашуви” талаб этилишини таъкидлаган.
Пеллизарри эса 2024 йил апрелида Франциянинг ўша пайтдаги бош вазири Габриэль Аттал, мудофаа вазири Себастьян Лекорню ва ташқи ишлар вазири Стефан Сежурне устидан судга шикоят қилган. Генерал ҳукуматни Франция армияси захирасидаги ҳарбий техникани Украинага топширгани учун танқид қилган. Суд бу шикоятни кўриб чиқиш прокуратура ваколатига киришини асос қилиб, уни қабул қилмаган.
Пеллизаррининг айтишича, унинг ишдан бўшатилиши “шикоят билан боғлиқ ноқонуний жазо чораси” ҳисобланади.
Изоҳ (0)