АҚШ президенти администрацияси Хитой билан ҳамкорликни чеклайдиган давлатларга нисбатан божни камайтирмоқчи. Бу ҳақда манбаларга таяниб, The Wall Street Journal хабар берди.
Вашингтон божларни пасайтириш бўйича музокараларда 70 дан ортиқ давлатга шундай талаб қўймоқчи. Бу давлатлар ўз ҳудудида Хитой компанияларининг фаолият юритишини ва улар орқали товар етказиб берилишини тақиқлаши мумкин. Бундан ташқари АҚШ унинг савдо ҳамкорлари “Хитойдан арзон саноат маҳсулотларини истеъмол қилишни” тўхтатишини истайди.
Бу борадаги талаблар мамлакат ва унинг Хитой иқтисодиётига жалб қилинганлик даражасига қараб фарқланади, дейди WSJ суҳбатдошлари.
Тегишли таклиф мауллифларидан бири АҚШ молия вазири Скотт Бессентдир. Бу каби чоралар орқали у Хитой иқтисодиётини заифлаштириш, уни яккалаш ва АҚШ билан савдо урушида чекинишга мажбур қилишни мақсад қилган.
WSJ маълумотларига кўра, Бессент учбу режани Трампга 6 апрель куни Флоридадаги Мар-а-Лаго қароргоҳида бўлиб ўтган учрашувда тақдим этган. Кейинроқ президент Fox News телеканалига Панама канали ҳақида берган интервьюсида шундай стратегияга ишора қилган.
Хусусан, у мамлакатларни “АҚШ ва Хитой ўртасида танлов қилишга мажбурлаш” имкониятини кўриб чиқишини айтган. Трамп Пекинни савдо урушини ҳал қилиш бўйича музокараларни бошлаш учун у билан боғланишга чақирди.
Хитой биз билан битим тузиши керак. Биз улар билан битим тузишимиз шарт эмас. Хитойга бизда мавжуд бўлган нарса — америкалик истеъмолчи керак, дея АҚШ президенти баёнотларини етказган Оқ уй матбуот котиби Каролин Ливитт.
Трампнинг савдо уруши
2 апрель куни АҚШ президенти Дональд Трамп барча давлатлар учун 10 фоизлик асосий тарифларни жорий қилди. Улар қаторида Ўзбекистон ҳам бор. Аммо божлар ҳар бир давлатнинг савдо балансига қараб ўзгарди. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказди.
Бунга жавобан Пекин ҳам шунча миқдорда Америка товарларига божлар солди. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилди. Шу сабабли божлар 104 фоизга ошди.
Натижада Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди. Хитой мазкур тарифларга жавобан ставкани 125 фоизга кўтарди.
Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирди. ХХР раиси Си Цзиньпин ҳеч бир давлат “бож уруши”дан ютмаслигини қайд этди.
Изоҳ (0)