Ўзбекистон Қирғизистон билан чегарада савдо-саноат зоналари ташкил этишни режалаштирмоқда. Бу ҳақда Шавкат Мирзиёев 16 апрель куни бўлиб ўтган йиғилишда маълум қилди.
Йиғилишда қайд этилишича, ҳар йили Андижондан Қирғизистонга 200 млн долларлик экспорт амалга оширилмоқда. Президент Қўрғонтепа ва Хўжаободда ҳам худди Афғонистон чегарасидаги каби эркин савдо ва саноат зоналари ташкил этиш муҳимлигини айтди.
Шавкат Мирзиёев мутасаддиларга тадбиркорлар билан маслаҳатлашган ҳолда ушбу иккита ҳудуддан биттасини танлаб, мастер-режа ишлаб чиқишни топширди.
Хўжаободдаги “Дўстлик” постидаги катта тирбандликдан аҳоли ҳам, ташувчилар ҳам норози эканига эътибор қаратилди. Масъул вазирлик ва идоралар олдига тирбандлик сабабини ўрганиб, тез фурсатда бунинг ечими бўйича таклиф бериш вазифаси қўйилди.
Йиғилишда давлат раҳбари Ўзбекистон—Қирғизистон—Хитой темирйўли қурилиши лойиҳасига ҳам тўхталиб ўтди. Президент бу йирик лойиҳа ишга тушиши натижасида ташиш муддати 1 ҳафтага, масофаси 1 минг километрга қисқариб, юк ташиш 10 баробар ошишини айтди.
“Лекин, ички темир йўл тармоқларимиз, божхона пунктлари, станциялар бу юкни қабул қилиш ва ўтказишга қанчалик тайёр?”, дея савол қўйди давлати раҳбари.
Мутасаддиларга бу борадаги ҳисоб-китобларни қилиб, амалга ошириладиган ишлар бўйича дастур тайёрлаш топширилди.
Эркин савдо зоналари
Сурхондарё вилояти Термиз туманида 2024 йилнинг августида Марказий Осиёдаги биринчи эркин савдо зонаси очилганди. Мазкур эркин савдо зонаси Ўзбекистон ва Афғонистон чегарасида жойлашган бўлиб, қиймати 70 миллион долларни, умумий майдони 36 гектарни ташкил этади. Ҳудудда меҳмонхона, замонавий тиббиёт клиникаси, бизнес мактаб, йирик савдо ва хизмат кўрсатиш маркази, ресторанлар, хостел ҳамда йилига 900 минг тонна юк айланмаси қувватига эга логистика маркази ҳамда ишлаб чиқариш корхоналари жамланган.
Ўзбекистон—Туркманистон чегарасида ҳам эркин савдо зонаси ташкил қилинади. 2024 йилнинг февралида Шавкат Мирзиёевнинг тегишли фармони имзоланган. Унга кўра, ушбу эркин савдо зонаси товарларни сақлаш, саралаш, сотиш, транспорт ва бошқа замонавий хизматлар инфратузилмасини яратиш учун Хоразм вилояти Шовот туманида ташил этилади.
Изоҳ (0)