НАТО Украинага Россия билан можарони тинч йўл билан ҳал этиш бўйича келишув доирасида альянсга қўшилишни ваъда бермаган. Шу сабабли бу узоқ муддатли кўриб чиқишни талаб этадиган масала бўлиб қолмоқда. Бу ҳақда НАТО бош котиби Марк Рютте расмий ташриф билан Брюсселда бўлган Германия канцлери Фридрих Мерц билан қўшма матбуот анжуманида маълум қилди.
“НАТО Украинага НАТОга қайтмас йўлни ваъда қилди, аммо биз ҳеч қачон бунинг тинчлик келишуви натижаси бўлишини ваъда қилмаганмиз. Биз буни узоқроқ истиқболга мўлжалланган масала деб ҳисоблаймиз”, деди у Мерц билан “Россия билан можаро тугаганидан сўнг хавфсизлик кафолатлари”нинг бир қисми сифатида Украинани альянсга таклиф қилиш ғоясини қўллаб-қувватлаш ҳақидаги саволга жавобан.
Унинг сўзларига кўра, Украинанинг альянсга узоқ муддатли истиқболда аъзо бўлиш эҳтимоли бор, бироқ ҳозирда олиб борилаётган тинчлик музокаралари доирасида эмас.
Рютте альянс 2024 йилги саммит якунлари бўйича Украина учун фақат аъзоликка “қайтмас йўл”ни белгилаганини, аммо аниқ кафолатлар ёки муддатларни тақдим этмаганини эслатди. Бу ибора НАТОда таъкидланганидек, Украинанинг қўшилиши бўйича аниқ қарорлар йўқлиги учун ўзига хос компенсация эди.
АҚШ президенти Дональд Трамп 25 апрель куни Киевнинг НАТОга қачондир кириши эҳтимолдан узоқлигини айтди ва Украинанинг блокка аъзо бўлиш даъволари Россия Федерацияси билан можарога сабаб бўлганини таъкидлади.
Рютте 4 апрель куни Украинага ҳеч ким уни можаро тугаши биланоқ НАТОга қабул қилишни ваъда қилмаганини айтди. Унинг таъкидлашича, альянс аввалроқ Киевга ташкилотга аъзо бўлишнинг қайтмас йўлини ваъда қилган эди.
Россия президентининг матбуот котиби Дмитрий Песков Украина НАТОга аъзо бўлмаслиги керак, чунки бу Россиянинг миллий манфаатларига таҳдид туғдиришини билдирганди. Унинг айтишича Украинанинг НАТО иттифоқига қўшилиши масаласи ҳозирги можаронинг асосий сабабларидан бири ҳисобланади.
Изоҳ (0)