АҚШ президенти Дональд Трамп Оқ уйдаги журналистларга Европа Иттифоқидан келтирилаётган маҳсулотларга келажакда “шубҳасиз” бож солиғини жорий этиш ниятида эканлигини маълум қилди.
Бож солиғини жорий этаманми? Сизга тўғрисини айтайми ёки сиёсий жавоб берайми? Албатта жорий этаман. Европа Иттифоқи бизга нисбатан жуда ёмон муносабатда бўлди, деди Трамп.
Сиёсатчи ЕИга нисбатан “жуда жиддий чоралар” кўришини қўшимча қилди.
Республикачининг фикрича, ЕИ Қўшма Штатларга қўшилган қиймат солиғи масаласида “ўта адолатсиз” муносабатда бўлмоқда.
Уларнинг солиқлари юқори. Улар бизнинг қишлоқ хўжалиги маҳсулотларимизни ҳам, автомобилларимизни ҳам қабул қилмайди, лекин ўзлари бизга миллионлаб автомобилларни жўнатишади, деди сиёсатчи.
Еврокомиссия маълумотларига кўра, 2023 йилда ЕИ ва АҚШ ўртасидаги товар ва хизматлар савдоси ҳажми 1,5 триллион евродан ошган. Нефть мойлари, хом нефть, дори-дармон, фармацевтика препаратлари ҳамда табиий газ блокнинг АҚШдан импорт қиладиган энг оммабоп товарлари ҳисобланади.
Трампнинг ЕИга нисбатан бошқа даъволари ҳам мавжуд. Хусусан, сиёсатчи Европа Иттифоқининг рухсатнома бериш тартибидан норози — унинг сўзларига кўра, “қандайдир йирик лойиҳани маъқуллаш учун беш ёки олти йил кутиш керак бўлган”. Шунингдек, у Брюсселни Apple, Google ва бошқа Америка корпорацияларига нисбатан жарималар ва монополияга қарши терговлар учун қоралади.
Республикачи бир неча бор Европа иттифоқидан барча импорт товарларига янги 10-20 фоизли божлар жорий этиш билан таҳдид қилган эди.
Бунга йўл қўймаслик учун Брюссел Америка нефть ва газини кўпроқ сотиб олиши керак, деб ҳисоблайди Трамп.
Еврокомиссия “мутаносиб равишда” жавоб беришга тайёрлигини маълум қилди, шу билан бирга Европа Иттифоқи раиси Урсула фон дер Ляйен савдо уруши хавфи фонида “жарликка қараб пойга қилиш”дан сақланишга чақирди.
Трамп 3 та давлатга божлар жорий қилди
АҚШ Канада, Хитой ва Мексикадан келтирилаётган товарларга божхона тўловларини жорий этади. Президент Дональд Трамп тегишли фармонни 1 февраль куни имзолади. У мазкур қарорини ноқонуний мигрантлар ва гиёҳванд моддалар контрабандаси таҳдиди билан изоҳлади. Бунга жавобан Хитой АҚШни савдо уруши бошланишидан огоҳлантирди.
Хитой Ташқи ишлар вазирлиги баёнотида “савдо ёки божхона урушида” ғолиблар бўлмаслиги таъкидланган.
Қўшимча 10 фоиз миқдоридаги божлар мамлакатлар ўртасидаги наркотрафикка қарши курашда икки томонлама ҳамкорликка таъсир қилиши ва унга зарар етказиши муқаррар, дейилади вазирлик хабарида.
Хитой “янги божларни қатъиян рад этиши” ва ўз ҳуқуқ ва манфаатларини қатъий ҳимоя қилиши учун “тегишли жавоб чораларини кўриши”ни таъкидлади. Эндиликда Хитой Жаҳон савдо ташкилотига (ЖСТ) АҚШга қарши шикоят қилиш ниятида.
Изоҳ (0)