Хитой автомобилсозлик, аэрокосмик саноат, чип ишлаб чиқариш ва ҳарбий саноат учун зарур металлар экспортига чекловлар киритди. Бу ҳақда мамлакат Савдо вазирлигига таяниб, The New York Times хабар берди.
Эндиликда экспортчилар оғир нодир ер металлари ва магнитларни ташиш учун махсус лицензия олиши шарт. Лицензия бериш тизими эндигина йўлга қўйилмоқда, бу эса жараённинг чўзилишига олиб келиши мумкин.
Янги тартиблар ишлаб чиқилаётган бир пайтда, Хитойдаги кўплаб портларда магнитлар етказиб бериш тўхтатилган.
Экспорт чекловлари глобал таъминот занжирларига “дарҳол ва стратегик таъсир” кўрсатиши мумкин, деб ёзади Holland & Knight юридик фирмаси.
Оғир нодир ер металлари автомобилсозлик, дронлар, роботлар, ракеталар ва фазовий аппаратлар учун зарур бўлган магнитлар тайёрлашда ишлатилади. Бу металлар, шунингдек, реактив двигателлар, лазерлар, автомобиль фаралари ва баъзи ўт олдириш шамларини ишлаб чиқариш учун кимёвий моддалар таркибига киради.
Хитой дунё бўйича нодир ер магнитларининг 90 фоизини етказиб беради, дейди CRU тадқиқот маркази.
Бу магнитлар Хитойнинг АҚШга бўлган экспортида жуда кичик улушни ташкил этади. Шунинг учун Хитой иқтисодий жиҳатдан катта йўқотишга учрамайди. Бироқ чекловлар бошқа давлатлар учун жиддий оқибатларга олиб келиши мумкин.
Савдо уруши доирасида АҚШ президенти Дональд Трамп Хитойга қарши бож ставкаларини жорий қилган ва уларнинг умумий ҳажми 145 фоизга етган. Трампнинг ҳар бир бож оширишига жавобан Пекин ҳам худди шундай чоралар кўрган. Натижада, АҚШ маҳсулотларига нисбатан бож ставкаларини 125 фоизга оширган. Хитой бу борада “уришишни истамаслигини, лекин ундан қўрқмаслигини” айтган.
Изоҳ (0)