АҚШ президенти Дональд Трамп агар Пекин Америка божларига қарши жавоб чораларидан воз кечмаса, 9 апрелдан бошлаб Хитойдан келтирилаётган товарларга 50 фоиз миқдорида қўшимча божлар жорий этиш билан таҳдид қилди. Бу ҳақда Америка етакчиси Truth Social ижтимоий тармоғида ёзган.
“Кеча Хитой аллақачон ўрнатилган рекорд даражадаги божлар, номонетар тарифлар, компанияларни ноқонуний субсидиялаш ва валюта билан кенг кўламли узоқ муддатли манипуляцияларга қўшимча тарзда 34 фоизлик жавоб тарифларини жорий этди. Бу мамлакатимизга нисбатан узоқ муддатли тариф бузилишларидан ташқари қўшимча тарифлар киритиш орқали АҚШга қарши жавоб чораларини кўрган ҳар қандай давлат дарҳол янги ва сезиларли даражада юқори тарифларга дуч келиши ҳақидаги огоҳлантиришимга қарамай амалга оширилди”, дея ёзди у.
Трампнинг таъкидлашича, агар Хитой эртанги кунга қадар ўзининг узоқ вақтдан бери мавжуд бўлган “савдо суиистеъмолликлари” устига 34 фоизлик оширишини бекор қилмаса, 2025 йил 8 апрелда Қўшма Штатлар Хитойга 9 апрелдан кучга кирадиган 50 фоизлик қўшимча божларни жорий этади.
“Бундан ташқари, Хитой билан улар сўраган учрашувлар бўйича барча музокаралар тўхтатилади. Учрашув ўтказишни сўраган бошқа давлатлар билан музокаралар дарҳол бошланади. Ушбу масалага эътибор қаратганингиз учун ташаккур”, дея хулоса қилди Америка етакчиси.
Эслатиб ўтамиз, АҚШ президенти Дональд Трамп 2 апрель куни 185 та мамлакат ва ҳудуддан келтирилаётган маҳсулотларга божхона тўловлари жорий этилишини эълон қилганди. Хитойга нисбатан АҚШ божлари 34 фоиз даражасида белгиланди. Бунга жавобан Хитой ҳукумати 10 апрелдан бошлаб АҚШдан импорт қилинадиган барча маҳсулотларга 34 фоиз миқдорида қўшимча божлар жорий этилишини маълум қилди. Шундан сўнг АҚШ президенти ўзининг ижтимоий тармоғида Хитойнинг АҚШга қарши жавоб тариқасида бож тўловлари киритиши хато қадамлигини билдириб, танқид қилганди.
Изоҳ (0)