АҚШ ўзининг янги божлари туфайли дунёнинг барча мамлакатлари билан иқтисодий ядро урушини бошлайди. Бу ҳақда миллиардер Билл Экман ўзининг Х (собиқ Twitter) саҳифасида ёзиб қолдирди.
У бизнесга сармоя киритиш тўхташи, истеъмолчилар харажатларини қисқартириши ва бутун дунё назарида Америка обрўсига шундай зарар етадики, уни тиклаш учун йиллар ёки ўн йиллар талаб этилишини айтди. Тадбиркор нафақат йирик компаниялар, балки ўрта ва кичик бизнес ҳам кўпроқ муаммоларга дуч келишидан огоҳлантирди. Чунки деярли ҳеч ким бир кеча-кундузда кескин ошган харажатларни кўтара олмайди.
Бизнес — бу ишончга асосланган ўйин. Президент бутун дунё бўйлаб бизнес раҳбарларининг ишончини йўқотмоқда. Бунинг оқибатлари мамлакатимиз ва президентни қўллаб-қувватлаган миллионлаб фуқароларимиз, айниқса, шундоқ ҳам катта иқтисодий қийинчиликни бошдан кечираётган кам даромадли истеъмолчилар учун жуда салбий бўлади. Биз бунга овоз бермаганмиз, деб ёзди Экман.
Инвестор АҚШ президенти Дональд Трампнинг бошқа давлатлар АҚШнинг устунликларидан фойдалангани ва иқтисодий фойда кўргани ҳақидаги далилларига қўшилди. Бироқ 7 апрель куни божлар бўйича қарорларни музлатишни эълон қилишга (9 апрель куни кучга кириши керак), “музокаралар олиб бориш ва адолатсиз асимметрик бож келишувларини ҳал қилиш, АҚШга триллионлаб долларлик янги инвестицияларни жалб қилишга” чақирди.
Акс ҳолда биз ўз қўлимиз билан яратган иқтисодий ядро қишига яқинлашмоқдамиз ва бизга бир оз тин олиш керак. Совуққонлик ҳукм сурсин, деди у.
Forbes ҳисоб-китобларига кўра, Экманнинг бойлиги 8,9 миллиард долларга баҳоланмоқда. Бизнесмен дунёнинг энг бой одамлари рейтингида 310-ўринни эгаллаб турибди. У 2004 йилда Pershing Square Cаpital Management ҳедж-фондига асос солган ва уни бошқаради, ташкилотнинг умумий активлари 15 миллиард долларни ташкил этади.
Экман ўнлаб йиллар давомида демократларни қўллаб-қувватлаган ва 2021 йилда ҳатто Трампдан истеъфога чиқишни талаб қилган, бироқ 2024 йилги сайловларга бир неча ой қолганда республикачига ўз қўллаб-қувватлашини билдирган. Кузда у Демократик партия тарқалиб кетишини исташини айтган эди.
Трампнинг савдо сиёсати
Трамп томонидан дунё товарларига нисбатан божлар 2 апрель куни эълон қилинди. Унга кўра, Ўзбекистон маҳсулотларига 10 фоизлик бож белгиланган, айрим мамлакатлар учун эса бу кўрсаткич 50 фоизга етган. Мазкур чоралар жаҳон иқтисодиётида секинлашув хавотирларини кучайтирди.
Инвесторлар анъанавий хавфсиз активлар, жумладан, олтинга сармоя киритишни бошлаган. Натижада 3 апрель куни тарихда илк бор олтин нархи бир унсия учун 3200 доллардан ошган. Хитой жавобан АҚШ маҳсулотларига 34 фоизлик бож жорий этган.
Трамп 12 мартдан бошлаб Европа Иттифоқидан 28 миллиард долларлик пўлат ва алюминий импортига 25 фоизлик бож белгилаган эди. Шу куни Европа комиссияси раҳбари Урсула фон дер Ляйен иттифоқ томонидан 26 миллиард долларлик “кучли, аммо мутаносиб” қарши чораларга тайёрланаётганини эълон қилган.
Изоҳ (0)