Америкалик миллиардер Илон Маск импорт товарларига божлар жорий этилгани ортидан президент Дональд Трампнинг маслаҳатчиси билан жанжаллашди. Бу ҳақда New York Post хабар берди.
Маск илгари ҳам халқаро савдода божлар қўлланишига қарши чиққан. Ўтган ҳафта у бу борада қуйидаги фикрни билдирган эди:
Идеал ҳолатда Европа ҳам, Қўшма Штатлар ҳам, менимча, Европа ва Шимолий Америка ўртасида эркин савдо зонасини шакллантириб, нол тарифларга ўтиши керак, деган миллиардер.
У, шунингдек, импорт божларини фаол қўллаб-қувватлаётган Оқ уйнинг бош иқтисодий маслаҳатчиси Питер Наваррони кескин танқид қилган.
Гарварддаги иқтисод фанлари доктори даражаси яхши эмас, ёмон. Бу эса эго/мия билан боғлиқ муаммога олиб келади, деб ёзган Маск Х платформасида Наваррони танқид қилиб.
Бунга жавобан Трамп маслаҳатчиси Илон Маск бизнес эгаси экани ва шу сабабли жорий этилган божлардан мамнун эмаслигини айтган.
Биз нима бўлаётганини яхши тушунамиз. Илон Маск автомобиль сотади. У шунчаки ўз манфаатларини ҳимоя қилмоқда, деган Наварро.
Наварронинг айтишича, Tesla автомобиллари асосан Техасдаги заводларда ишлаб чиқарилса-да, улар учун зарур бўлган кўплаб эҳтиёт қисмлар Хитой, Мексика, Япония, Тайван ва бошқа давлатлардан олиб келинади. Трамп жорий қилган божлар эса айнан ушбу таъминот занжирига зарба берди. Ҳозирча Оқ уй Маскнинг баёнотларига ҳеч қандай расмий муносабат билдирмади.
Сўнгги вақтларда Tesla компанияси жиддий йўқотишларга учрамоқда. 2024 йил якунларига кўра, компания электромобиллар бозорида ҳам даромад, ҳам сотув ҳажми бўйича Хитойнинг BYD компаниясидан ортда қолди.
Мутахассислар бу ҳолатни Tesla моделларининг янгиланмаслиги, шунингдек, Маскнинг сиёсий фаоллиги фонида истеъмолчилар ишончи пасайгани билан боғламоқда. Европада савдо кескин тушган, АҚШда эса баъзи харидорлар Маск билан алоқаси бўлмаслиги учун ўз автомобилларини иккиламчи бозорда фаол сотишга киришган.
Трампнинг савдо сиёсати
Трамп томонидан дунё товарларига нисбатан божлар 2 апрель куни эълон қилинди. Унга кўра, Ўзбекистон маҳсулотларига 10 фоизлик бож белгиланган, айрим мамлакатлар учун эса бу кўрсаткич 50 фоизга етган. Мазкур чоралар жаҳон иқтисодиётида секинлашув хавотирларини кучайтирди.
Инвесторлар анъанавий хавфсиз активлар, жумладан, олтинга сармоя киритишни бошлаган. Натижада 3 апрель куни тарихда илк бор олтин нархи бир унсия учун 3200 доллардан ошган. Хитой жавобан АҚШ маҳсулотларига 34 фоизлик бож жорий этган.
Трамп 12 мартдан бошлаб Европа Иттифоқидан 28 миллиард долларлик пўлат ва алюминий импортига 25 фоизлик бож белгилаган эди. Шу куни Европа комиссияси раҳбари Урсула фон дер Ляйен иттифоқ томонидан 26 миллиард долларлик “кучли, аммо мутаносиб” қарши чораларга тайёрланаётганини эълон қилган.
Изоҳ (0)