Эрон олий раҳнамоси Оятуллоҳ Али Хоманаий армияни юқори жанговар шай ҳолатга келтиришга кўрсатма берди. Бу ҳақда дипломатик идорадаги манбага таяниб, Reuters хабар берди.
Қарор АҚШнинг эҳтимолий ҳарбий операцияси ҳақидаги хабарлар фонида қабул қилингани айтилмоқда. Эрон Ироқ, Кувайт, Бирлашган Араб Амирликлари, Қатар, Туркия ва Баҳрайнга агар улар АҚШга ўз ҳудудидан ҳужум қилишига йўл қўйса, буни душманлик ҳаракати сифатида баҳолаши ва ҳарбий йўл билан жавоб бериши мумкинлиги ҳақида огоҳлантирган.
Эроннинг юқори мартабали мулозимига кўра, бундай ҳаракат “улар учун жиддий оқибатларга олиб келади”. АҚШ президенти Дональд Трамп март ойи бошида Эрон олий раҳнамосига мактуб йўллаб, унга янги ядровий келишув тузиш учун икки ой муҳлат берган эди.
Мактубда янги ядровий битим бўйича музокаралар ўтказиш қатъий талаб қилинган. АҚШ мактуб мазмуни ҳақида бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Эрон олий раҳнамоси 12 март куни мактубни олгач, Трампнинг музокаралар ҳақидаги таклифини “алдов” деб атаган. 30 март куни эса Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортган. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Икки томон ўртасида тўғридан тўғри музокаралар ўтказиш имконияти рад этилган бўлса-да, билвосита музокаралар учун йўл очиқлиги таъкидланди, деган Эрон президенти
Бунга жавобан Трамп агар келишув бўлмаса, Эронни бомбардимон қилиш билан таҳдид қилган.
Агар улар келишувга эришмаса, унда бомбардимон бўлади. Бу улар ҳеч қачон кўрмаган бомбардимон бўлади, деган АҚШ раҳбари.
Мазкур таҳдидлар фонида Эрон ракеталарини жанговар шай ҳолатга келтирган. Учиришга тайёр бўлган ракеталарнинг катта қисми бутун мамлакат бўйлаб ҳаво ҳужумларига бардош бера оладиган тарзда лойиҳалаштирилган ерости иншоотларига жойлаштирилган, дейилади хабарда.
Эрон олий раҳнамоси Али Хоманаий эса АҚШнинг ташқаридан зарба бериши эҳтимоли камлигини айтмоқда.
Ёвузлик ташқаридан амалга оширилиши даргумон, аммо агар у амалга оширилса, улар, албатта, қаттиқ жавоб зарбасини олади, деган у.
Изоҳ (0)