Самарқанд шаҳрида тўрт нафар шахс ўғриликка тушиб, уй эгасини пичоқ билан қўрқитди. Бу ҳақда Тергов департаменти хабар берди.
Келтирилишича, 30 март куни Самарқанд шаҳрида яшовчи 44 ёшли фуқаро Р.Д. Самарқанд шаҳар ИИО ФМБ 102 қисқа рақамига мурожаат қилиб, бу ҳақда хабар берган. У ўз аризасида 29 март кунидан 30 март кунига ўтар кечаси номаълум шахслар яшаш хонадонига кириб, пичоқ билан қўрқитганини, уйидан 1900 АҚШ доллари миқдоридаги пулларини олиб кетганини маълум қилган.
Ушбу ҳолат бўйича Самарқанд шаҳар ИИО ФМБ ҳузуридаги тергов бўлими томонидан номаълум шахсларга нисбатан Жиноят кодексининг 164-моддаси 2-қисми “а” ва “б” бандлари билан жиноят иши қўзғатилган.
Тезкор тергов ҳаракатлари натижасида 2 нафар 23 ёшли шахслар жиноятга алоқадор экани аниқланган. Бундан ташқари, мазкур жиноятда яна 24 ёшли фуқаро Х.С. ва 17 ёшли вояга етмаган А.Ф.лар ҳам бўлгани аниқланиб, барча гумон қилинувчилар процессуал тартибда ушланган.
Дастлабки тергов давом этмоқда.
Куни кеча, 4 апрель куни Тошкент вилояти Чирчиқ шаҳрида дорихона ходимини ўлдириш билан қўрқитиб, пул ўғирлаган эркакка суд ҳукми ўқилди. Воқеа тафсилоти: юзини яширган эркак дорихонага кириб келади. Сотувчини таҳдид остида ушлаб туради ва кассадаги пулни олиб кетади. Дорихона сотувчиси судда кўрсатма берди. У Жиноят кодексининг 164-моддасининг иккинчи қисми “а” банди билан айбдор деб топилди ва 8 йил муддатга озодликдан маҳрум қилиш жазоси тайинланди.
Бундан аввал Андижонда пул ташиладиган автомобилга ниқобли босқинчилар ҳужум қилган эди. Мазкур ҳолат бўйича Жиноят кодексининг 164-моддаси 2-қисми “б” банди (босқинчилик, бир гуруҳ шахслар томонидан олдиндан тил бириктириб) билан жиноят иши қўзғатилиб, Ю.Д. процессуал тартибда ушланган.
Изоҳ (0)