Американинг Comex биржасида олтин нархи бир троя унсия учун 2901 доллардан ошди. Бу тарихдаги рекорд кўрсаткич ҳисобланади.
Чикаго товар биржасида апрель ойидаги олтин фьючерслари 0,89 фоизга кўтарилди. Аввалги рекорд 3 февраль куни қайд этилган бўлиб, ўшанда нарх 2 минг 872 долларга баҳоланганди. 31 январда эса олтин бир троя унсия учун 2850 доллардан ошган. Нархнинг ошиши АҚШ ва Хитой ўртасидаги савдо зиддиятларининг кучайиши фонида хавфсиз активларга бўлган талаб билан боғлиқ.
АҚШ президенти Дональд Трамп 1 февраль куни Канада, Мексика товарларига 25 фоизгача, Хитойникига эса 10 фоизгача божлар жорий қилди. Бунга жавобан Хитой АҚШнинг кўмир ва суюлтирилган газига 15 фоиз, нефть, қишлоқ хўжалиги техникаси ҳамда автомобилларга 10 фоиз бож солди.
Бундан ташқари, Пекин таркибида волфрам, теллур, рутений ва молибден бўлган материаллар устидан экспорт назоратини кучайтирди. Calvin Klein, Tommy Hilfiger ва Van Heusen брендларига эгалик қилувчи PVH Corp ва генетик тестлаш соҳасидаги маҳсулот ҳамда хизматлар етказиб берувчи Illumina Inc.ни “ишончсиз” ташкилотлар рўйхатига киритди.
АҚШ савдо сиёсатидаги ноаниқликлар Мексика ва Канада билан муносабатларга ҳам таъсир кўрсатди. Дастлаб ушбу мамлакатлардан импорт учун 25 фоизлик божлар жорий этиш режалаштирилганди, бироқ вақтинчалик келишувдан сўнг тарифларни жорий этиш камида бир ойга кечиктирилди. Шунга қарамай, савдо муносабатларидаги ноаниқлик олтинга бўлган юқори талабни сақлаб қолишда давом этмоқда, дейди ING товар стратегияси бўлими бошлиғи Уоррен Паттерсон.
Экспертларнинг фикрича, божлар ва савдо чекловлари янада кенгайиши бозорларда ўзгарувчанликнинг кучайишига олиб келиши мумкин. Бундай шароитда анъанавий ҳимоя активи ҳисобланган олтин, долларнинг мустаҳкамланишига қарамай, қимматлашишда давом этади. Олтин кўпинча инвесторлар томонидан инфляция ва геосиёсий беқарорликдан ҳимоя қилиш воситаси сифатида фойдаланади.
Ўзбекистонда олтин қуймалар нархи рекорд даражада ошди
Бир грамм олтин ҳозирда 1 миллион 197 минг 760 сўмга баҳоланмоқда. Беш граммлик олтин қуйманинг нархи 5 миллион 989 минг сўмни ташкил қилмоқда.
Ўзбекистонда 2025 йил 17 январдан бошлаб 100 граммлик олтин қуймалар ҳам сотувга чиқарилди. Уларнинг нархи 3 февраль ҳолатига кўра 119 миллион 776 минг сўмни ташкил қилмоқда.
- 10 грамм олтин қуйма нархи 11 миллион 978 минг сом;
- 20 грамм олтин қуйма нархи 23 миллион 955 минг сўм;
- 50 грамм олтин қуйма нархи 59 миллион 888 минг сўмга тенг бўлди.
Олтин қуймалар нима ва улардан қандай фойдаланиш мумкин?
Олтин қуймалар — оғирлиги 5, 10, 20, 50, 100 грамм бўлган, 999,9 софликдаги олтиндан тайёрланган қуймалар. Махсус ҳимоя қадоқларида сотув учун тақдим этилади. Олтин қуймаларнинг қадоғи сертификат вазифасини бажаради ва ўз серия рақамига эга бўлади.
Олтин қуймалари ҳимояланган қадоқларда сотилади ва уларни бемалол уйда ёки банкда — индивидуал банк ячейкаларини ижарага олган ҳолда сақлаш мумкин. Уларнинг нархи бир ҳафта ичида бир неча марта ўзгариши мумкин. Олтин қуймаларини фақат банкларга сотиш мумкин.
Изоҳ (0)