АҚШ президенти Дональд Трамп Россия товарларига қарши божлар киритмасликка қарор қилди, чунки ҳозирда мамлакат билан Украинадаги урушни тугатиш бўйича музокаралар давом этмоқда. Бу ҳақда Оқ уй Миллий иқтисодий кенгаши директори Кевин Гассетт маълум қилди.
Россия ва Украина билан музокаралар давом этаётгани аниқ ва ўйлайманки, президент бу икки масалани аралаштирмасликка қарор қилган, деди у ABC News’га берган интервьюсида.
Гассетт бу келажакда Россияга “бошқа ҳар қандай давлатга қараганда бутунлай бошқача муносабатда бўлиши”ни англатмаслигини таъкидлади.
Сиз музокаралар жараёнида, кўплаб америкаликлар, украиналиклар ва россияликлар ҳаётига таъсир қиладиган янги масалаларни тўсатдан кўтаришни маслаҳат берармидингиз? Албатта, бундай қилмасдингиз...Музокаралар давомида янги масалаларни кўтариш тўғри эмас. Бу адолатдан эмас. Россия ҳозирда минглаб одамларнинг ҳаётига таъсир кўрсатадиган тинчлик музокараларининг қизғин палласида. Президент Трамп айнан шу масалага эътибор қаратмоқда, деди у.
Шунга қарамай, АҚШ уруш якунлари бўйича музокараларда иштирок этаётган Украинага қарши 10 фоизлик бож жорий этди. Оқ уй матбуот котиби Керолайн Ливитт аввалроқ Америка санкциялари аллақачон Россия билан ҳар қандай “муҳим савдони” истисно қилаётгани сабабли Россия товарларига бож солинмаганини айтганди. АҚШ молия вазири Скотт Бессент Россия билан савдо санкциялар туфайли амалга оширилмаётгани, шунинг учун у божлар жорий этиладиган мамлакатлар рўйхатида йўқлигини таъкидлаган.
2024 йилда Россия ва АҚШ ўртасидаги товар айирбошлаш ҳажми 3,5 миллиард долларни ташкил этди. Бу 1992 йилдан бери энг паст кўрсаткичдир. 2021 йилда, Россиянинг Украинага кенг кўламли босқинидан олдин ҳам, бу кўрсаткич 35 миллиард долларни ташкил этган.
Трампнинг дунё товарларига нисбатан божлари 2 апрель куни эълон қилинди. Ўзбекистон маҳсулотларига ҳам 10 фоизлик бож солинмоқда. Баъзи мамлакатларга нисбатан божлар миқдори эса 50 фоизга етган.
Бу АҚШнинг ҳаракатлари жаҳон иқтисодиёти секинлашишига сабаб бўлиши мумкинлиги ҳақидаги хавотирларни келтириб чиқарди. Натижада инвесторлар хавфсиз ҳисобланган активларга, жумладан, олтинга йўналишди. Бу эса қимматбаҳо металл нархининг кўтарилишига олиб келди. 3 апрель куни тарихда илк бор олтин нархи бир унсия учун 3200 доллардан ошди. Хитой божларга жавобан Америка товарларига 34 фоизлик тарифлар белгилади.
Изоҳ (0)