АҚШ президенти Дональд Трамп агар Эрон ўз ядровий дастури бўйича келишувга рози бўлмаса, мамлакатни бомбардимон қилиш билан таҳдид қилди. Бу ҳақда BBC хабар берди.
Агар улар келишувга эришмаса, унда бомбардимон бўлади. Бу улар ҳеч қачон кўрмаган бомбардимон бўлади, деди Трамп.
У Эрон маҳсулотларига нисбатан иккиламчи санкциялар билан ҳам таҳдид қилди. Президент икки давлат ўртасида “алоқалар мавжудлигини” қайд этди.
Трамп янги битим тузиш таклифи билан Эрон олий раҳнамоси Оятуллоҳ Али Хоманаийга мактуб йўллаган эди. У бунинг учун Теҳронга 2 ой муҳлат берган.
Сиёсатчи йўллаган мактубида янги ядровий битим бўйича музокаралар ўтказишни қатъий талаб қилган. У таклифни рад этиш оқибатларидан огоҳлантирган. Оқ уй мактуб мазмуни ҳақида АҚШнинг бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Теҳроннинг муносабати
Эрон олий раҳнамоси 12 март куни мактубни олгач, Трампнинг музокаралар ҳақидаги таклифини “алдов” деб атади. 30 март куни эса Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортди. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Икки томон ўртасида тўғридан-тўғри музокаралар ўтказиш имконияти рад этилган бўлса-да, билвосита музокаралар учун йўл очиқлиги таъкидланди, деди Эрон президенти.
2015 йилда Буюк Британия, Германия, Хитой, Россия, АҚШ, Франция ва Эрон ядровий келишувни — Эрон ядровий дастурига чекловлар эвазига санкцияларни бекор қилишни назарда тутувчи Қўшма кенг қамровли ҳаракатлар режасини имзолади. АҚШ Трамп президентлиги даврида 2018 йилнинг май ойида ушбу келишувдан чиққан ва Теҳронга қарши санкцияларни тиклаган. Бунга жавобан Эрон келишув бўйича ўз мажбуриятларини босқичма-босқич қисқартириш, ядровий тадқиқотлар, центрифугалар ва уранни бойитиш даражасидаги чекловлардан воз кечишини эълон қилган.
Трамп қайта президентликка сайлангач, Эронга “максимал босим ўтказиш” кампаниясини бошлади. Унинг мақсади Исроилнинг асосий душманини заифлаштириш, Эрон ядровий бомбаси яратилишига йўл қўймаслик ва Эрон баллистик ракеталарининг узоқлигини чеклашдир.
Вашингтоннинг асосий рақиби ҳисобланган Хитой эса Эронга қарши ноқонуний санкцияларга чек қўйишни таклиф қилмоқда. У буни ядро дастури бўйича музокараларни боши берк кўчадан олиб чиқишга ёрдам беради, деб ҳисоблайди. Март ойи ўрталарида Хитой Эрон ва Россия делегацияларининг учрашувини қабул қилганди, бир ҳафта олдин эса Россия Трамп маъмуриятига Эрон билан мулоқотда ёрдам беришга рози бўлгани ҳақида хабарлар пайдо бўлган эди.
Изоҳ (0)