Эрон Ғарб билан музокараларда ўзига тенг шароитларни таъминлаш учун ядро қуролини яратиши керак. Бу ҳақда Олий Мажлис депутати Муҳаммад Қосим Усмоний маълум қилди.
Унинг сўзларига кўра, Эрон ҳарбий можародан қочиб, оқилона ва мантиқий ҳаракат қилмоқда, бироқ “дунё такаббурлиги” унга бошқа йўл қолдирмади.
Ягона йўл — тўхтатиб туриш воситаси сифатида ядро қуролини яратиш сари шиддатли ва тўхтовсиз ҳаракат қилиш, деди у йиғилишда сўзга чиқиб.
Депутат Эрон ядро қуролини яратишдан барча соҳаларда, жумладан, миллий хавфсизлик соҳасида ҳам фойда олиши мумкинлигини таъкидлади. Усмонийнинг фикрича, ядровий фан Теҳронни Ғарб билан “тенг шартлар асосида” музокаралар олиб боришга олиб келади.
АҚШ президенти Дональд Трамп март ойи бошида Эрон олий раҳнамосига мактуб йўллаб, унга янги ядровий келишув тузиш учун икки ой муҳлат берган эди. Мактубда янги ядровий битим бўйича музокаралар ўтказиш қатъий талаб қилинган. АҚШ мактуб мазмуни ҳақида бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Эрон олий раҳнамоси мактубни олгач, Трампнинг музокаралар ҳақидаги таклифини “алдов” деб атаган. Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортган. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Бунга жавобан Трамп агар келишув бўлмаса, Эронни бомбардимон қилиш билан таҳдид қилган. Мазкур таҳдидлар фонида Эрон ракеталарини жанговар шай ҳолатга келтирган. Учиришга тайёр бўлган ракеталарнинг катта қисми бутун мамлакат бўйлаб ҳаво ҳужумларига бардош бера оладиган тарзда лойиҳалаштирилган ерости иншоотларига жойлаштирилган.
Бундан ташқари Оятуллоҳ Али Хоманаий армияни юқори жанговар шай ҳолатга келтиришга кўрсатма берган. Қарор АҚШнинг эҳтимолий ҳарбий операцияси ҳақидаги хабарлар фонида қабул қилингани айтилмоқда. Эрон Ироқ, Кувайт, Бирлашган Араб Амирликлари, Қатар, Туркия ва Баҳрайнга агар улар АҚШга ўз ҳудудидан ҳужум қилишига йўл қўйса, буни душманлик ҳаракати сифатида баҳолаши ва ҳарбий йўл билан жавоб бериши мумкинлиги ҳақида огоҳлантирган.
Изоҳ (0)