АҚШ президенти Дональд Трамп 4 март куни Канада ва Мексика товарларига қўшимча 25 фоиз тариф жорий қилди. Бунга жавобан Канада ҳам АҚШдан экспорт қилинган товарларга 25 фоизлик божлар қўллади. Бу ҳақда Al Jazeera хабар берди.
Америка 21 кун ичида божларни олиб ташламаса, 125 миллиард Канада доллари миқдоридаги АҚШ импортига яна 25 фоизлик бож жорий этилиши мумкин. Таҳлилчилар прогнозларига кўра, АҚШ ушбу тарифларни бекор қилган тақдирда ҳам, бошқа кўплаб йиғимлар эвазига инфляция даражаси юқорилигича қолаверади.
Бундан ташқари, Канада ҳозиргача эълон қилган тарифларидан ташқари, АҚШга электр энергияси экспортига тарифлар жорий этишни ҳам кўриб чиқмоқда. Мутахассислар Трампнинг тарифлари Канадада 1,5 миллион иш ўрнини қисқартириб, Канада иқтисодиётини турғунлик ҳолатига олиб келишини прогноз қилмоқда.
Канада бош вазири Жастин Трюдонинг айтишича,Трамп ушбу божларни Канада иқтисодиётининг бутунлай қулашига сабаб бўлиши йўлида жорий қилган, чунки бу мамлакатни аннексия қилишни осонлаштиради.
Бу ерда гап фақат тарифлар ҳақида эмас. Биз гувоҳи бўлаётган вазиятда энг безовта қилувчи жиҳат Канада ва АҚШ ўртасидаги муносабатлардир. Шу сабабли ҳозир Канадада экзистенсиал кураш авж олган. Бу барча провинциялар ва партиялар етакчилигини талаб қилмоқда, чунки эртага нима бўлишини ҳеч ким билмайди, деди Канаданинг Осиё-Тинч океани жамғармасининг тадқиқот ва стратегия бўйича вице-президенти Нажибулла .
Нажибулланинг таъкидланишича, ҳозирги таранглик фақат савдо билан чегараланадими ёки ташқи сиёсат, мудофаа ва хавфсизлик чоралари каби бошқа соҳаларга ҳам хавф соладими, номаълум.
Трамп, шунингдек, Мексикага ҳам 25 фоизлик тарифларни жорий этди. Хитойнинг тарифларини эса икки баравар ошириб, 20 фоизга кўтарди. Мексика бунга жавоб қайтаришга ваъда берди.
Хитой 10 мартдан бошлаб АҚШнинг айрим импорт маҳсулотларига 10 фоиздан 15 фоизгача бож жорий этишини эълон қилди, шунингдек, АҚШнинг белгиланган субъектлари учун бир қатор янги экспорт чекловларини жорий этди. Шунингдек, АҚШ устидан Жаҳон савдо ташкилотига шикоят қилди.
Аммо ялпи тарифлар бекор қилинган тақдирда ҳам, янада мослаштирилган тарифлар сақланиб қолиши ва ўз навбатида инфляцияни келтириб чиқариши мумкин, бу эса барча иштирокчи мамлакатлар иқтисодиётига зарар етказади.
Иқтисодий таъсир барча томонлар учун сезиларли бўлади, чунки нархлар ва инфляция ошади ва бизнес нафақат ушбу тарифлар орасида, балки келгусида ўрнатиладиган бошқа тарифлар билан ҳам қийналмоқда, деди Янги Америка хавфсизлиги маркази катта илмий ходими Рейчел Зимба.
АҚШ савдо вазири Ховард Лутник 4 март куни Fox Business телеканалига берган интервьюсида Трамп Канада ва Мексика билан тарифлар бўйича ўрта даражага етишини ва бу ҳақда 5 март куни эълон қилиниши кутилаётганини айтганди.
Қандай муросага эришилишидан қатъи назар, бу Шимолий Америка савдо шериклари ўртасидаги муносабатларга етказилган зарарни тўлиқ тикламайди, деди Зимба.
Изоҳ (0)