Албатта, ҳар бир актёр ёки актриса ўз қаҳрамонига ўзига хос хусусиятларни беради. Аммо битта ролни ўйнаган турли актёрлар томошабинларда ҳам ўзгача таассурот қолдиради.
Чани
Франк Гербертнинг “Дюна” романини кино форматига мослаштириш жуда қийин бўлишига қарамай, режиссёрлар умидсизликка тушмайди ва асарни ўз версиялари бўйича суратга олишга ҳаракат қилишади. Масалан, 2000 йилда Чани ролини чех актрисаси Барбора Кодетова ўйнаган мини-сериал экранларга чиқади. У ўз ролида жуда табиий эди, фильмнинг баъзи жойларида у шафқатсизлик ва қатъият кўрсатади.
2021 йилда режиссёр Дени Вилнёв “Дюна”нинг янги версиясини суратга олади. Баъзи танқидчи ва томошабинлар Чани ролига Зендеянинг танланганидан мамнун бўлмайди. Улар актрисанинг зерикарли эканини айтишади. Бироқ “Дюна”даги Зендаяни ёқтирганлар ҳам бор. Баъзи танқидчиларнинг таъкидлашича, у қисқа вақт ичида жуда кўп ҳис-туйғуларни маҳорат билан намойиш эта олган.
Мария Антуанетта
1990 йилда Уте Лемпер иштирокидаги “Австриялик аёл” фильми экранларга чиқади. Унда актриса ҳаётининг сўнгги кунларини яшаётган Мари Антоинетте ролини ўйнайди. Томошабинларнинг таъкидлашича, мазкур фильм малика ҳақидаги шунга ўхшаш фильмлардан кўп жиҳатдан фарқ қилади. Аммо унинг асосий ютуғи Уте Лемпернинг ўзи бўлиб, у ўз қаҳрамонига ғайриоддий таъсир кўрсата олган, шунингдек, бутун ҳис-туйғуларни — қайғу, асабийлик, умидсизлик, ғазаб ва қўрқувни томошабинга етказа олган.
16 йил ўтгач, янги “Мария Антуанетта” фильми тақдим этилади, ундаги бош рол Кирстен Данстга насиб этади. Режиссёр София Копполанинг сўзларига кўра, бу фильм тарихий ҳақиқатга даъво қилмаган. Кирстен Данстнинг вазифаси Мария Антуанеттани хушчақчақ ўсмир қиздан ҳафсаласи пир бўлган хотингача, меҳрибон она ва маликагача тасвирлаш эди. Актриса бу вазифани қойилмақом тарзда уддалайди.
Элвис Пресли
Элвис Пресли ҳақида 10 дан ортиқ фильм суратга олинган, шунинг учун ишонч билан айтиш мумкинки, бу қўшиқчининг шахсияти кино ижодкорларининг эътиборини тортади. 1979 йилда “Элвис” фильми суратга олинади, унда Курт Расселл бош ролни ўйнайди. Элвис ҳаётининг кўп қисми мазкур фильмда намойиш этилган — мусиқадаги илк қадамларидан тортиб, эстрада чўққисини забт этгунга қадар. Фильм турли хил баҳоларга сазовор бўлади. Танқидчилар асосан Расселлнинг ижроси ва костюмларининг дизайнини мақташади.
2022 йилда бош ролни Остин Батлер ўйнаган “Элвис” фильми экранларга чиқади. Кўплаб танқидчилар ушбу фильмни ижобий қабул қилишади, айниқса, ёш актёрнинг ажойиб ижросини таъкидлайдилар. Улардан бири Остин Батлер ташқи кўриниши ва овози жиҳатидан Пресли ролига жуда мос келишини ёзган.
Эстер / Элли
“Юлдуз туғилди”нинг 4 та версияси мавжуд. Биринчиси 1937 йилда Эстер ролини Жанет Гайнор ўйнаган фильм бўлган. Кўп йиллар ўтгач, ушбу картина классик Голливуд эртаги деб номланади, бу фильм замонавий кинога таъсир ўтказади. Кўпчилик Гайнорнинг қаҳрамонини тасвирлашдаги табиийлигини таъкидлайди.
Баъзиларга эса 1954 йилги Жуди Гарленд ижроси ёқади. У Эстерни шунчалик содда ва самимий тасвирлайдики, айнан шу жиҳат актрисани ушбу рол учун идеал деб аташга имкон беради. Кўпчилик бу фильмнинг биринчи ва иккинчи версиялари классик эканлигига қўшилади.
1976 йилда Барбра Стрейзанд Эстер сифатида пайдо бўлади. Баъзилар айнан шу версияни энг ёмони деб ҳисоблашади, чунки қўшиқчи ижро этган Эстер персонажи ниҳоятда зерикарли чиққан.
Ниҳоят 2018 йилда Леди Гага иштирокида “Юлдуз туғилди” фильмининг янги версияси чиқди. Аммо унинг қаҳрамонига Элли номи берилди. Баъзи танқидчиларнинг таъкидлашича, Леди Гага қаҳрамонини шунчалик ҳақиқий ўйнаганки, унинг ўзи машҳур қўшиқчи эканлигини ҳам унутасиз.
Ҳидэсабуро Уэно / Паркер Уилсон
“Хатико ҳикояси” (1987) фильми 1920—1930 йилларда Японияда содир бўлган реал воқеага асосланган. Хатико узоқ йиллар кутган профессор Ҳидэсабуро Уэно ролини Тацуя Накадай моҳирона ижро этган. 1987 йилда бу фильм Япония бозорида биринчи ўринни эгаллайди ва буларнинг барчаси кўп жиҳатдан ролини моҳирлик билан ўйнай олган Накадай туфайлидир.
22 йилдан сўнг янги “Хатико” фильми экранларга чиқади, бош ролни Ричард Гир ижро этади. Танқидчиларнинг таъкидлашича, ушбу версия япон версиясига қараганда кўпроқ сентиментал ва камроқ қайғули.
Чолиқуши
Рашод Нури Гунтекиннинг “Чолиқуши” романига асосланган фильмларнинг жами 4 та варианти маълум. Биринчиси 1966 йилда чиққан. Унда Фериде ролини Туркан Шорай ижро этган. Томошабинлар фильм ажойиб драматик, қизиқарли ва романтик чиққанини таъкидлайди. Кўп жиҳатдан бундай эътирофга актриса туфайли эришилган.
1986 йилда Айдин Шенер иштирок этган фильм суратга олинади. Сериал асосан бош қаҳрамоннинг саргузаштларига бағишланган, шунинг учун у биринчи фильмга қараганда бир оз фожиалироқ якунланади. Шенер ижросидаги Фериде сериалнинг кейинги версиясига қараганда анча нафис эди.
2005 йилда у романнинг ХХ аср бошидаги воқеаларга эмас, балки замонавий Истанбулда бўлиб ўтадиган “Янги Чолиқуши” телесериали суратга олинади. Аммо мазкур сериал бизга маълум бўлмаган сабабларга кўра бекор қилинади.
2013 йилда Фериде ролини Фахрие Эвжен ўйнайди. Гунтекин романининг сўнгги талқини том маънода унга янги ҳаёт бағишлайди, янги авлод томошабинларини ушбу севги ҳикояси билан таништиради. Бу сериалда Эвжен барча қийинчиликларга дош берадиган қатъиятли ва ўжар қаҳрамонни тасвирлайди. Айниқса, унинг севгилиси Комрон ролини ижро этган Бурак Ўзчивит билан ўртасидаги муҳаббат таъсирли чиққан.
Хадича
Томошабинларнинг кўпчилиги 2001 йилдан 2002 йилгача намойиш этилган Бразилиянинг “Клон” телесериали билан таниш. Ушбу сериал нафақат Бразилияда, балки бошқа мамлакатларда ҳам ҳитга айланди. Қаҳрамонлардан бири Хадича бош қаҳрамон бўлмаса-да, томошабинлар хотирасида сақланиб қолди. Ушбу рол ижрочиси Карла Диас жуда ҳиссиётли ва хушчақчақ қизча эди. Айнан шу жиҳат томошабинларнинг илиқ ҳис-туйғуларига сабаб бўлади.
2010 йилда ушбу сериалнинг ремейки Колумбияда худди шу ном остида чиқарилади. Янги версияда Хадича ролини Валерия Чагуи ижро этган. Бироқ ёш актриса оригинал сериалдаги ҳамкасби каби қувноқ эмасди.
Изоҳ (0)