Афғонистон пойтахти Кобулда худкуш террорчининг портловчи мосламаси ҳукумат биноси яқинида ишга тушди. Оқибатда бир киши ҳалок бўлди, яна уч киши яраланди. Бу ҳақда Al Jazeera хабар берди.
Худкуш 13 февраль куни Шаҳарсозлик ва уй-жой қурилиши вазирлиги биносига киришга уринган, бироқ хавфсизлик кучлари томонидан нишонга олинган. У нишонга олинганидан кейин портловчи қурилмаси ишга тушган. Оқибатда хавфсизлик хизматининг бир нафар ходими ҳалок бўлган.
Жароҳатланганлар эса портлашдан кейин даволаниш учун муассасага олиб кетилган. Ҳужум учун жавобгарликни ҳеч бир гуруҳ ўз зиммасига олмаган. Ҳозирда ҳолат юзасидан тергов ишлари олиб борилмоқда.
Ҳужум шаҳарнинг гавжум қисмига қаратилган бўлиб, у ерда ҳукумат идоралари, шунингдек, хорижий элчихоналар, жумладан, 2021 йилда Америка ва НАТО хорижий кучлари мамлакатни тарк этганидан бери бўш қолган АҚШ элчихонаси жойлашган.
“Толибон” 2021 йилда мамлакатни эгаллаб олди ва урушдан вайрон бўлган Афғонистонда хавфсизликни тиклашини айтди. Аммо ҳужумлар давом этмоқда, уларнинг аксарияти маҳаллий ИШИД жангарилари томонидан амалга оширилмоқда.
Бу 11 февраль куни Афғонистон шимоли-шарқидаги банк олдида худкуш террорчи ўз танасига боғланган портловчи моддаларни портлатиб, камида беш кишининг ўлимига сабаб бўлганидан кейинги иккинчи терактдир.
Изоҳ (0)