АҚШ ҳарбий базасида теракт уюштиришни режалаштирган Кувайт фуқароси ҳибсга олинди. Бу ҳақда Al-Arabiya нашри хабар берди.
Воқеа ҳақида дастлаб Кувайт Давлат прокуратураси хабар берган. Шахси ошкор қилинмаган фуқаро “тақиқланган ташкилотга аъзолик ва мамлакат ичида террорчилик ҳаракатларини режалаштириш” айби билан ҳибсга олинган.
Ҳибсга олинган шахс ижтимоий тармоқларда ўзи аъзо бўлган ташкилот фаолияти ва янгиликларининг аудио ва видео контентини мунтазам эълон қилиб борган. Расмийлар ҳибсдаги шахс дахлдор бўлган ташкилот номини маълум қилмаган.
Прокуратура хабарига кўра, эркак Америка қуролли кучларига тегишли лагерларни портлатиш ва тартибсизлик келтириб чиқариш мақсадида портловчи моддалар ясаш ва ишлатишни ўрганган. Тергов жараёнида у барча айбларига иқрор бўлган. Унга шерик бўлган бир нечта бошқа шахслар ҳақида ҳам маълумот тўпланган.
2024 йилнинг январь ойида Кувайт ички ишлар вазирлиги хавфсизлик кучлари шиа мазҳабига мансуб ибодат масканларида теракт уюштиришни режалаштирган террористик ячейка аниқланганини маълум қилган эди. Бунинг оқибатида ушбу ячейкага алоқадор 3 нафар шахс ҳибсга олингани айтилган.
Ироқ, Саудия Арабистони ва Эрон билан чегарадош бўлган Кувайтда АҚШнинг бир қанча йирик ҳарбий базалари жойлашган. Ушбу мамлакатда 2015 йилда худкуш-террорчи шиа мусулмонлари ибодат қиладиган масжидда теракт содир этган эди. Ҳодиса оқибатида 27 киши ҳалок бўлган. Ҳужум жангариларнинг сўнгги ўн йилликлардаги энг қонли ҳужумларидан бири деб ҳисобланган. Теракт учун жавобгарликни ИШИД ташкилоти ўз зиммасига олган.
Изоҳ (0)