Туркиядаги ИИВ биноси ёнида худкуш-террорчи ўзини портлатди (видео)

Анқарадаги Туркия Ички ишлар вазирлиги биноси яқинида худкуш-террорчи портловчи қурилмани ишга туширди. Бу ҳақда CNN Turk хабар берди.

Ички ишлар вазирлиги раҳбари Али Ерликаяга кўра, 1-октябр куни икки террорчи кичик фургонда вазирлик биноси яқинидаги дарвоза олдида тўхтаган. Улардан бири портловчи қурилмани ишга тушириб, ҳалок бўлган. Иккинчиси эса зарарсизлантирилган. 

Reuters нашрининг ёзишича, зарарсизлантириш ҳужумчи полиция томонидан отиб ташланганини англатади. Ҳодиса оқибатида икки полициячи енгил жароҳат олган, Туркия ИИВ раҳбари бошқа тафсилотларни ошкор қилмаган.

“Бизнинг курашимиз охирги террорист зарарсизлантирилгунга қадар давом этади”, — деди Ерликая.

Ҳозирча Туркияда фаолият юритаётган ҳеч бир ташкилот портлаш учун масъулиятни ўз зиммасига олгани йўқ ва расмийлар ҳам, уларнинг фикрича, ҳужум ортида ким турганини эълон қилмаган.

Террорчилар Америка ва Россияда ишлаб чиқарилган қуроллар билан қуроллангани айтилмоқда:

1. РПО-А “Шмел” реактив пиёда ўт очувчи қурол, Россияда ишлаб чиқарилган.
2. Американинг Cоlt М4 Cаrbine автомати.

Туркия хавфсизлик кучларининг асосий версияси шуки, бу қуроллар Туркияга Суриядан келган.