Афғонистон шимоли-шарқида бомба портлаши оқибатида камида беш киши ҳалок бўлди, етти киши жароҳатланди, деб хабар бермоқда Al Jazeera.
11 февраль куни маҳаллий вақт билан соат 08:35 да Қундуз вилоятидаги Кабул Банк филиали яқинида портлаш содир бўлган. Ҳозирча ҳеч ким портлаш учун жавобгарликни ўз зиммасига олмаган.
Полиция маълумотларига кўра, ҳалок бўлганлар орасида банк қўриқчиси ва яна тўрт киши, жумладан, тинч аҳоли ва Афғонистонда ҳукмрон “Толибон” гуруҳи аъзолари бўлган.
Қўлбола портловчи қурилмалардан фойдаланган худкуш-террорчи ўзини портлатиб юборди, дея таъкидлади Қундуз вилояти полицияси вакили Жумадин Хаксар.
Унинг қўшимча қилишича, полиция ҳодисада айбдорларни топиш ва уларни жавобгарликка тортиш учун тегишли ташкилотлар билан ҳамкорлик қилмоқда.
Мамлакатда кўплаб қуролли гуруҳлар, жумладан ИШИД ҳамон таҳдид солмоқда.
2021 йил октябрь ойида Қундуздаги шиалар масжидида содир этилган теракт оқибатида ўнлаб одамлар ҳалок бўлган эди. Теракт учун жавобгарликни ИШИДнинг Хуросон вилоятидаги ячейкаси ўз зиммасига олган.
Ўтган йилнинг март ойида жанубдаги Қандаҳор шаҳрида худкуш террорчи банк яқинида бомба портлатиб, камида уч кишининг умрига зомин бўлган эди. Ўшанда ҳужум учун жавобгарликни ИШИДнинг минтақавий бўлими ўз зиммасига олган.
Изоҳ (0)