Франция полицияси 19 апрель куни Париждаги Эрон консуллик биноси олдида ўзини портлатиш билан таҳдид қилган эркакни ҳибсга олди. Бу ҳақда Reuters нашри хабар берди.
Манбада айтилишича, эркак консуллик қаршисидаги бинога кириб олган ва ўзини ҳамда теваракдаги биноларни портлатиш билан таҳдид қилган. Париж полицияси эркакни худкуш террорчи ҳисоблаб, унга қарши кенг кўламли ҳаракат бошлаган ва ҳудудни ўраб олган.
Эркак ҳибсга олингач, тинтув чоғида ҳеч қандай портловчи модда йўқлиги аниқланган. Расмийлар тергов давом этаётганини маълум қилган.
Париж полициясининг Reuters агентлигига хабар беришича, эркак маҳаллий вақт билан эрталаб соат 11:00 да консуллик биноси олдида пайдо бўлган. Унинг қўлида граната бўлган ва худкуш террорчиларники каби портловчи жилет кийиб олган.
Тезкор гуруҳлар фавқулодда хабар ортидан консуллик биноси жойлашган бутун кўчани ўраб олган ва эркакни зарарсизлантирган. Тинтувда тортиб олинган граната ва жилет аслида қўлбола хавфсиз буюмлар экани маълум бўлган.
Полициядаги манбаларнинг айтишича, эркак ўтган йилнинг сентябрида Эрон консуллиги яқинида ёнғин уюштиришга уринишда гумон қилинган одамнинг айнан ўзидир. Le Parisien газетаси эркак укасининг ўлими учун қасос олишга ҳаракат қилиб, ушбу хатти-ҳаракатни амалга оширган.
Изоҳ (0)