Истанбул марказидаги Истиқлол кўчасида портлаш уюштирган террорчилар Суриянинг Манбижа шаҳридан кўрсатма олган, деди Туркия ички ишлар вазири Сулаймон Сойлу ҳукумат комиссияси йиғилишида.
«Мерсин ва Истиқлол кўчасига ҳужум Манбиждан туриб уюштирилган», — деди Туркия ички ишлар вазири.
Сойлунинг сўзларига кўра, ўтган 12 ой ичида мамлакат хавфсизлик кучлари 200 та терактни, жумладан 18 таси худкуш террорчиликнинг олдини олган. Унга кўра, қўлга олинган 1 248 нафар террорчидан 393 нафари «Курдистон ишчилар партияси» аъзоси эканини айтган. Бу партия Анқарада террорчи ташкилот деб ҳисобланади.
Сойлу Истиқлол кўчасидаги терактни «Курдистон партиясининг тинч аҳолига қарши типик ҳужуми» деб атади. «Биз ўша пайтдаёқ жиноятчини топгандик, ҳозир унинг ортида турган бутун тузилмани ўрганмоқдамиз. Бунинг ортида ‘Курдистон ишчилар партиясиъни қўллаб-қувватлайдиган АҚШ турибди», — деди Туркия ИИВ раҳбари.
Вазир айтаётган Мерсиндаги теракт 27 сентябрь куни полиция биноси ёнида содир бўлган эди. ИИВ маълумотларига кўра, ҳуқуқ-тартибот ходимлари ниқоби остида курд террорчилари полиция биносига киришга уринган, уларни қўлга олиш чоғида отишма бошланган. Бир нафар полициячи ҳалок бўлган.
Истанбул марказидаги машҳур сайёҳлик кўчаси Истиқлолда эса 13 ноябрь куни портлаш содир бўлди. Олти киши ҳалок бўлди, камида 81 киши, жумладан, Ўзбекистон фуқароси жароҳат олди. Истанбул Бош прокуратураси портлашни теракт деб баҳолади.
Жиноятга алоқадорликда гумон қилиниб, 50 киши, жумладан Сурия фуқароси Аҳлам Альбашир қўлга олинди — аёл бомбани Истиқлол кўчасига қўйиб, уни портлатгани айтилмоқда. Полиция Альбаширнинг «Курдистон ишчилар партияси» билан алоқаси борлигини даъво қилмоқда. Партиянинг ўзи бу терактга алоқадорлигини рад этиб, тинч аҳолига ҳужум қилмаслигини таъкидламоқда.
Изоҳ (0)