Покистонда яна теракт содир этилди, 9 нафар полициячи ҳалок бўлди

Покистон жануби-ғарбида худкуш террорчи ўзини портлатиб юборди, деб хабар бермоқда Deutsche Welle маҳаллий расмийларга таяниб.

Ҳодиса Балужистон вилояти маркази Кветтадан 160 километр шарқда жойлашган Сиби шаҳри яқинида содир этилган. Расмийларга кўра, худкуш террорчи мототциклда кетаётган бўлган ва орқадаги полиция юк машинасига бориб урилган.

Портлаш оқибатида камида тўққиз нафар хавфсизлик ходими ҳалок бўлди. Яна 16 киши жароҳатланди.

Расмийларнинг айтишича, полиция бир ҳафталик йирик чорвачилик кўргазмасидан қайтаётган эди, улар кўргазмада хавфсизликни таъминлаган.

Ҳозирча портлаш учун жавобгарликни ҳеч қайси гуруҳ ўз зиммасига олмагани айтилмоқда, бироқ бу ноябрь ойида ҳукумат ва “Толибон” ўртасидаги тинчлик музокаралари бузилганидан кейин Покистон полициясига ҳужумлар кучайган бир пайтда содир бўлмоқда, деб таъкидлайди DW. Балужистон вилоятининг ўзи ҳам Афғонистон, ҳам Эрон билан чегарадош.

30 январь куни Пешовардаги масжидда портлаш содир бўлганди. Ҳодиса пайтида бино ичида 400 га яқин одам бўлган. Полиция маълумотларига кўра, масжид ичидаги одамлардан бири намоз ўқиш учун навбатда турган пайтда ўзини портлатган. 60 дан ортиқ одам ҳалок бўлган.

Февраль ойи ўрталарида Карачи шаҳрида қуролланган эркаклар полициянинг бош идорасига бостириб кириб, улардан бири ўзини портлатганди. Ҳужум оқибатида тўрт киши ҳалок бўлди, 11 киши жароҳатланди.