Афғонистоннинг Балх вилояти губернатори Муҳаммад Довуд Музаммил 9 март куни эрталаб содир бўлган портлашда ҳалок бўлди. Бу ҳақда TOLOнеwс телеканали “Толибон” ҳаракатининг Балхдаги куч тузилмаларига таяниб хабар берди.
Таъкидланишича, Музаммил Мозори Шариф шаҳрида жойлашган вилоят маъмурияти биносидаги портлаш оқибатида ҳалок бўлган. Портлаш бинонинг иккинчи қаватида гранатали жилет кийган худкуш террорчи томонидан содир этилган. Губернатордан ташқари яна икки киши ҳалок бўлган.
Бу ҳодиса “Толибон” 2021 йил августида ҳокимиятни эгаллаганидан кейин тайинлаган энг юқори мартабали амалдорлар орасида биринчи ўлим бўлди.
Теракт учун жавобгарликни ИШИДнинг Афғонистонда фаолият юритаётган жангарилари ўз зиммасига олди.
Эслатиб ўтамиз, Балх Ўзбекистон билан чегарадош бўлиб, айнан шу вилоят орқали Ўзбекистондан Афғонистонга турли маҳсулотлар ва инсонпарварлик ёрдамлари, жумладан, халқаро юклар олиб келинади. Бундан ташқари, Термиз шаҳри Мозори Шариф билан темирйўл орқали боғланган. Шаҳарга Ўзбекистоннинг турли делегациялари мунтазам ташриф буюради.
2022 йилнинг 5 июль куни Термиз шаҳридаги “Мажнунтол” маҳалласига Балх вилоятидан отилган бешта снаряд тушганди. Оқибатда тўртта хусусий уйга кичик зарар етган. Кейинчалик маълум бўлишича, снарядларни ИШИДнинг Афғонистондаги бўлими жангарилари отган, улар ушланган.
Изоҳ (0)