Анқарадаги Туркия Ички ишлар вазирлиги биноси ёнида содир этилган портлашни мамлакатда террорчи деб тан олинган Курдистон ишчилар партиясининг (КИП) икки нафар аъзоси амалга оширган, деб хабар бермоқда TRT Haber телеканали.
Ўтказилган тадқиқотлар ва ДНК таҳлиллари натижасида Туркия Ички ишлар вазирлиги теракт ташкилотчиларидан бирининг исми Ҳасан Ўғуз, иккинчиси Ўзкан Шаҳин эканлигини аниқлади.
Анқарадаги теракт 1-октябр куни эрталаб содир этилганди. Туркия ички ишлар вазири Али Ерликайнинг сўзларига кўра, икки нафар террорчи ИИВ Хавфсизлик Бош бошқармаси дарвозасига автомобилни ҳайдаб келиб, теракт содир этган. Жиноятчилардан бири ўзини портлатган, иккинчиси зарарсизлантирилган. Бундан ташқари, икки полициячи енгил жароҳат олган.
Ҳужум учун жавобгарликни КИП аъзолари ўз зиммасига олди. Бунга жавобан Туркия армияси Ироқ шимолидаги КИП нишонларига ҳаводан зарба берди. Таъкидланишича, 20 та объект йўқ қилинган.
Бундан ташқари Туркия ҳуқуқ-тартибот идоралари ходимлари мамлакат бўйлаб аксилтеррор операцияларини ўтказди ва КИПга алоқадорликда гумонланган 100 дан ортиқ одамни ҳибсга олди.
Изоҳ (0)