Кобулда худкуш террорчи “Толибон” Ташқи ишлар вазирлиги биноси олдида ўзини портлатди. Қурбонлар бор (видео)

Афғонистон пойтахти Кобулда 27 март куни “Толибон” Ташқи ишлар вазирлиги биноси олдида худкуш террорчи ўзини портлатди. Бу ҳақда Etilaatroz хабар берди.

“Толибон” Ички ишлар вазирлиги портлаш содир бўлганини тасдиқлади ва худкуш-террорчи нишонга етмасдан ҳалок бўлгани, у билан бирга бўлган мосламалар портлатилганини маълум қилди.

Портлаш оқибатида олти нафар тинч аҳоли вакили ҳалок бўлган ва бир неча киши жароҳатланган. Ярадорлар орасида “Толибон”нинг уч нафар кучлари ҳам бор. Ҳодиса назорат-ўтказиш пунктида содир бўлган. Террорчи ўлимидан олдин камарини ишга туширган, аммо нишонга етиб бормаган.

Айрим манбалар Кобулдаги шифохонага 12 нафар ярадор олиб келингани, портлаш оқибатида икки киши ҳалок бўлганини маълум қилган.