Қуролланган шахс 5 июнь куни АҚШнинг Ливандаги элчихонасига ҳужум уюштирган. Бу ҳақда Ливан маҳаллий нашрларига таяниб, Reuters нашри хабар берган.
Ливан армияси расмийлари ҳам ҳужум содир бўлганини тасдиқлаган. Қуролли фуқаро Байрутдаги АҚШ элчихонасига огоҳлантиришсиз ўқ узгани айтилган.
Воқеа содир бўлган ҳудудга тезкор равишда полиция ва хавфсизлик кучлари юборилган. Ҳужум иштирокчиси отишма оқибатида яраланиб, шифохонага олиб кетилган.
Расмийлар ҳужумчи Сурия фуқароси бўлганини маълум қилган. Айни дамда хавфсизлик хизматлари шаҳар бўйлаб бошқа қуролли шахсларни ҳам излаётгани маълум қилинган.
АҚШ элчихонаси ҳозирда иш фаолиятини бутунлай тўхтатган. У яқин фурсатда қайта очилиши эълон қилинган.
Ҳужум оқибатида яраланган ва ҳалок бўлганлар ҳақида хабар берилмаган. АҚШнинг Ливандаги элчиси Лиза Жонсон ҳам ҳужум рўй берган пайтда мамлакат ҳудудида бўлмаган.
Қорнидан яраланган суриялик фуқаро тузалгандан сўнг тергов давом этиши айтилган. Ҳозирда унинг аҳволи мўтадил экани билдирилган.
Байрутдаги АҚШ элчихонаси яқинига ҳужум содир этган шахснинг сурати жойлаштирилган. Уни танига фуқаролардан маълумот бериш сўралган.
Бир қанча маҳаллий нашрлар ҳужум ташкилотчиси сифатида “Ҳизбуллоҳ”га ишора қилган. Шунга қарамай, на “Ҳизбуллоҳ” ва на бошқа гуруҳ қуролли ҳужум учун масъулиятни ўз зиммасига олган.
Ҳозирда Ливан хавфсизлик кучлари АҚШ элчихонаси атрофида қўшимча назорат пунктлари ўрнатмоқда. Элчихона ҳудудини ҳарбий вертолёт назорат қилмоқда.
Ливан муваққат бош вазири Нажиб Микати мудофаа вазири ва хавфсизлик кучлари билан воқеани кузатиб бораётганини айтган. Қуролли шахслар уюшмасини тўлиқ қўлга олишда шахсан фаоллик кўрсатишини билдирган.
Маълумот ўрнида, 1983 йилда Ливан пойтахти Байрут шимолида жойлашган АҚШ элчихонаси ҳудудида теракт содир этилган. Худкуш террорчи элчихона биносига кириб олиб, ўзини портлатган. Ҳодисада 60 дан ортиқ киши ҳалок бўлган. Ушбу воқеадан сўнг элчихона нисбатан хавфсизроқ ҳудудга, Байрут жанубига кўчирилган.
Изоҳ (0)