“Толибон” ҳаракатига алоқадор Al Mersaad нашри Кермандаги худкуш террорчилар Тожикистон фуқаролари бўлиши мумкинлигини даъво қилиб, Тожикистон разведкасини ИШИД билан алоқадорликда айблади. Бу ҳақда Sputnik хабар берди.
Баёнотда Тожикистон ИШИД жангариларини ишлаб чиқаришнинг янги маркази сифатида минтақавий ва глобал хавфсизликка жиддий таҳдид солаётгани таъкидланади. Al Mersaad Америка, Европа, Туркия ва Россияда ИШИДга алоқадор кўплаб Тожикистон фуқаролари ҳибсга олинганига урғу беради.
“Тожикистон разведкаси ИШИД ва Тожикистон разведкаси ўртасида воситачи бўлиб ишлаган Германияда яшовчи фуқародан Тожикистон ҳукуматига босимни юмшатиш учун ҳужумларда иштирок этган ИШИДга алоқадор тожик фуқаролари номини ошкор қилишни сўраган”, — дейилади хабарда.
Ўз навбатида, Эрон Ички ишлар вазирлиги Керман шаҳрида содир этилган терактга алоқадорликда гумон қилинган шахслар ҳибсга олинганини маълум қилди. Разведка хизматлари ушбу шахсларнинг терактга алоқадорлиги ҳақида маълумот тўплашга муваффақ бўлган.
Эрондаги теракт
Эронда 3 январь куни генерал Қосим Сулаймоний ўлимининг тўрт йиллиги хотирасига бағишланган дафн маросими чоғида портлашлар содир бўлди. Теракт Сулаймоний дафн этилган қабристон яқинида юз берган. Эрон Бош прокуратураси Қосим Сулаймоний қабри ёнидаги теракт бўйича тергов бошлаган. Мамлакат олий раҳнамоси Оятуллоҳ Хоманаий ҳужумда Исроилни айблаган ва жавоб қайтарилишига ваъда берган.
Эронлик журналистлар портловчи қурилмалар масофадан туриб бошқарилганини айтган. Бироқ ҳужум учун жавобгарликни ўз зиммасига олган ИШИД буни рад этган. Террор ташкилоти икки нафар худкуш террорчи оломон ичида ўзини портлатиб юборганини маълум қилган. Эрон расмийларининг янгиланган маълумотларига кўра, 84 киши ҳалок бўлган, 284 киши яраланган.
Изоҳ (0)