Афғонистон ТИВ биноси ёнида 11 январь куни худкуш террорчи ўзини портлатиб юборгани ҳақида хабар берилганди. Ўзбекистон Ташқи ишлар вазирлиги мазкур ҳолат юзасидан баёнот эълон қилди.
Таъкидланишича, вазирлик содир этилган террорчилик хуружини кескин қоралайди.
Ушбу қабиҳ ҳаракат кўплаб инсонлар, асосан, ташқи сиёсат идораси ходимлари орасида қурбонларга сабаб бўлди. Ҳалок бўлганларнинг оила аъзолари ва яқинларига чуқур ҳамдардлик билдириб, жароҳатланганларнинг тезроқ соғайиб кетишини тилаймиз, — дейилади хабарда.
Маълумот учун, Афғонистон ТИВ биноси олдидаги теракт учун жавобгарликни ИШИД ўз зиммасига олди. Худкуш террорчининг исми Хайбар Қандагари бўлиб, Ташқи ишлар вазирлиги ходимлари ва қўриқчилари орасида ўзини портлатган. Ҳужум оқибатида 21 киши ҳалок бўлган, 40 киши жароҳатланган. «Толибон» вакилининг айтишича, худкуш террорчи вазирлик биносига киришга уринган. Жангари хавфсизлик ходимлари томонидан тўхтатилган, шундан сўнг у портлаш содир этган.
Ҳодиса юз берган кун Хитой делегацияси ТИВга келиши керак бўлган, бироқ портлаш вақтида улар у ерда бўлган ёки бўлмагани маълум эмас. Ҳужумдан мақсад ташқи ишлар вазири ўринбосари Шер Муҳаммад Аббос Станизкайни йўқ қилиш бўлгани айтилмоқда. Унинг хавфсиз ва саломат экани қайд этилган.
Афғонистондаги сўнгги портлашлар
1 январда Кобулдаги ҳарбий аэропортда портлаш юз бериб, 14 киши ҳалок бўлганди.
12 декабрь куни Кобул шаҳрида хитойликлар бўлган «Шаҳр-Но» меҳмонхонасига ҳужум қилинганди. Воқеа жойида бир неча портлашлар ҳам эшитилган.
Маълумот ўрнида, Афғонистоннинг Самангон вилоятидаги диний мактабда 29 ноябрь куни портлаш содир бўлганди. Ҳодиса оқибатида 35 киши ҳалок бўлган ва 23 киши жароҳатланган.
Изоҳ (0)