Afg‘oniston shimoli-sharqida bomba portlashi oqibatida kamida besh kishi halok bo‘ldi, yetti kishi jarohatlandi, deb xabar bermoqda Al Jazeera.
11-fevral kuni mahalliy vaqt bilan soat 08:35 da Qunduz viloyatidagi Kabul Bank filiali yaqinida portlash sodir bo‘lgan. Hozircha hech kim portlash uchun javobgarlikni o‘z zimmasiga olmagan.
Politsiya ma’lumotlariga ko‘ra, halok bo‘lganlar orasida bank qo‘riqchisi va yana to‘rt kishi, jumladan, tinch aholi va Afg‘onistonda hukmron “Tolibon” guruhi a’zolari bo‘lgan.
Qo‘lbola portlovchi qurilmalardan foydalangan xudkush-terrorchi o‘zini portlatib yubordi, deya ta’kidladi Qunduz viloyati politsiyasi vakili Jumadin Xaksar.
Uning qo‘shimcha qilishicha, politsiya hodisada aybdorlarni topish va ularni javobgarlikka tortish uchun tegishli tashkilotlar bilan hamkorlik qilmoqda.
Mamlakatda ko‘plab qurolli guruhlar, jumladan ISHID hamon tahdid solmoqda.
2021-yil oktyabr oyida Qunduzdagi shialar masjidida sodir etilgan terakt oqibatida o‘nlab odamlar halok bo‘lgan edi. Terakt uchun javobgarlikni ISHIDning Xuroson viloyatidagi yacheykasi o‘z zimmasiga olgan.
O‘tgan yilning mart oyida janubdagi Qandahor shahrida xudkush terrorchi bank yaqinida bomba portlatib, kamida uch kishining umriga zomin bo‘lgan edi. O‘shanda hujum uchun javobgarlikni ISHIDning mintaqaviy bo‘limi o‘z zimmasiga olgan.
Izoh (0)