2022 йил кузда Россиянинг Кобулдаги элчихонаси ёнида ўзини портлатган ўзбекистонлик Хусанжон Осимий ўлимидан сўнг Россияда судланади. Бу ҳақда “Коммерсант” хабар берди.
“Толибон” воқеа жойини кўздан кечириш ва гувоҳларни сўроқ қилиш бўйича протоколларни Россия Тергов қўмитасига юборган. Ўзбекистон расмийлари ҳам марҳум ҳақида маълумотларни берган.
Тергов версиясига кўра, у тақиқланган ИШИД террорчилик ташкилотига қўшилиб, худкуш-террорчи сифатида ҳаракат қилган. Марҳумнинг қариндошлари айбловга рози бўлмагани боис у Россияда сиртдан ва ўлимидан кейин суд қилинади.
2022 йилнинг 5 сентябрь куни ИШИД террорчилик гуруҳидан бўлган худкуш-террорчи Россиянинг Кобулдаги элчихонасининг консуллик бўлимига кириш жойи яқинида ўзини портлатиб юборган.
У консуллик ходими навбатда турган одамлар олдига чиққан пайтда портловчи қурилмани ишга туширган.
Оқибатда Россия элчихонасининг икки ходими: иккинчи котиб Михаил Шах ва хавфсизлик ходими Адигжи Кужугет ҳалок бўлган.
Улардан ташқари элчихонанинг ташқарисини қўриқлаб турган “Толибон” ҳаракатининг тўрт нафар жангчиси ҳам ўлган.
Жиноий иш билан Россия Тергов қўмитасининг бош тергов бошқармаси шуғулланган.
Тергов қўмитаси ва Бош прокуратуранинг халқаро ҳуқуқий ҳамкорлик бўлимлари ҳам терговга жалб қилинган. Ушбу икки тузилма орқали барча ёзишмалар олиб борилган, натижада суд жараёнининг ўн ойи давомида муносиб миқдордаги далиллар шакллантирилган.
Изоҳ (0)