Хитой раиси Си Цзиньпин 9 май куни Москвада бўлиб ўтадиган парадда иштирок этиш таклифини қабул қилди. Бу ҳақда Россиянинг Хитойдаги элчиси Игор Моргулов хабар берди.
Элчининг сўзларига кўра, Си Цзиньпин Москвага келиш таклифини қабул қилган, шунингдек, Россия президенти Владимир Путинни Япония устидан қозонилган ғалабанинг 80 йиллиги ва Иккинчи жаҳон уруши якунланганига бағишланган тантаналарда иштирок этиш учун Хитойга таклиф қилган.
Хитой томони ҳозирча Си Цзиньпиннинг Москвага ташрифи ҳақидаги маълумотга изоҳ бермади. Россия президенти матбуот котиби Дмитрий Песков 9 май парадиган “жуда кўп давлат раҳбарлари” таклиф этилганини айтганди. Жумладан, Москвага Словакия бош вазири Роберт Фицо, Сербия президенти Александр Вучич, Фаластин миллий маъмурияти раҳбари Маҳмуд Аббос, Бразилия президенти Луис Инасиу Лула да Сильва келмоқчи.
Хитой раиси Си Цзиньпин сўнгги бор Москвага 2023 йил март ойида келган. Ўшанда у Россия президенти Владимир Путин билан музокаралар ўтказган. Путин 2024 йилги парадга Марказий Осиё давлатлари раҳбарларини таклиф қилганди.
Изоҳ (0)