Хитой ўз иқтисодиётини юксалтириш учун Европа билан муносабатларини яхшилашга интилмоқда ва Москвадан “масофа сақлашга” ҳаракат қилмоқда, деб ёзади The New York Times (NYT).
Газета бунга мисол сифатида Хитой Коммунистик партияси Марказий қўмитасининг ташқи ишлар комиссияси бўлими бошлиғи Ван Ининг яқинда Европа мамлакатлари бўйлаб сафарини келтирди, унинг асосий мақсади мамлакати “иқтисодиётини зудлик билан тиклаш ва умумий тил топишиш учун Европа давлатларининг эътиборини тортиш” эди. NYT билан суҳбатлашган таҳлилчилар, Ван И шунингдек, Москвани бевосита қўллаб-қувватлашдан бош тортганини, “Хитой инқирознинг чўзилиб кетиши ва кучайишини истамаслигини” таъкидлаганини эслатди.
Шу билан бирга, нашрнинг қайд этишича, АҚШ Пекиннинг мулоқот ўрнатишга уринишларига қарамай, унга жиддий босим ўтказмоқда. Тахминан икки йиллик “совуқ муносабатлар”, йирик сармоявий келишувнинг барбод бўлиши ва Украинадаги урушдан сўнг, Европа етакчилари Хитой ўз оҳангини юмшатишини ва ўзи билан Москва ўртасидаги масофани янада узоқлаштиришга тайёрлигини кўрсатишга умид қилаётганди, дея таъкидлайди таҳлилчилар. Бунинг ўрнига жаноб Ван Мюнхендаги хавфсизлик конференциясига келиб, “жосус шар” ҳодисаси юзасидан АҚШ билан кескин тортишди ҳамда Вашингтоннинг реакциясини “бемаъни ва истерик” деб атади, дейилади мақолада.
Шу билан бирга, таҳлилчиларнинг таъкидлашича, Хитой Европа билан яқинлашишга уриниб, фақат АҚШни танқид қилмоқда. Улар Украинадаги урушда Пекиннинг Москвани бевосита қўллаб-қувватлашни истамаслиги Европа Иттифоқи билан савдо алоқаларини жонлантириш ниятидан далолат беришини истисно қилмади. Хитой Ғарб билан муносабатларнинг янада ёмонлашувига йўл қўймаслик учун Си Цзиньпиннинг Москвага ташрифи аҳамиятини пасайтириши мумкин, деб ёзади газета. Бундан ташқари, NYT таҳлилчилари Си Цзиньпин Россияга ташриф буюришдан аввал Ғарбий Европа пойтахтларига келиши мумкинлигини рад этмаяпти.
Украинада уруш бошланганидан кейин Хитой Россияга қарши санкция қўлламади ва бошқа давлатларнинг санкцияларини қоралади. Бундан ташқари, Хитой раҳбари Си Цзиньпин можарони тезроқ тугатишга чақирди ва уни сиёсий жиҳатдан ҳал этиш барча Осиё ва Европа давлатлари манфаатларига мос келишини таъкидлади. Февраль ойи ўрталарида ўтказилган Мюнхен конференцияси чоғида Ван И “барча мамлакатлар суверенитети”ни ҳурмат қилган ҳолда можарони ҳал қилиш бўйича Хитой режасини эълон қилди. Bloomberg агентлигига кўра, Пекиннинг Украинадаги урушни тугатиш режаси ўт очишни тўхтатишга чақириш ва Киевга қурол-яроғ етказиб беришни тўхтатиш кабиларни назарда тутади.
Изоҳ (0)