Россия президенти Владимир Путин шу ҳафта Пекинга ташрифи олдидан Хитойнинг Украина инқирозини тинч йўл билан ҳал қилиш режасини қўллаб-қувватлашини айтди. Бу ҳақда Reuters хабар берди.
Путин яна бир бор Россия икки йилдан ортиқ урушдан кейин мулоқот ва музокараларга очиқлигини таъкидлади.
Хитойнинг Украина инқирозини ҳал қилиш бўйича ёндашувини ижобий баҳолаймиз. Пекин ҳақиқатан ҳам унинг асосий сабабларини ва глобал геосиёсий аҳамиятини тушунади. Си Цзиньпин Германия канцлери Олаф Шольц билан музокараларда баён этган қўшимча принциплар эса Совуқ уруш менталитетини енгиш зарурати ҳақидаги ғояни ривожлантирувчи реал ва конструктив қадамлардир, — деди Россия президенти.
2023 йил Хитой 12 банддан иборат тинчлик режасини эълон қилди, унда урушни тугатишнинг умумий тамойиллари баён этилган, аммо аниқлик киритилмаган.
АҚШ тинчлик режасига жавобан Хитой “ўзини тинчликпарвар сифатида кўрсатаётгани”, лекин Россия босқинини қораламаслигини билдирди. Си Цзиньпиннинг қўшимча тамойиллари қуйидагиларни ўз ичига олади:
- тинчликка эришиш ва ғаразли манфаатларни кўзламаслик;
- вазиятни юмшатиш ва “оловга мой қуймаслик”;
- тинч музокаралар учун шарт-шароит яратиш ва можароларнинг янада кучайишига йўл қўймаслик;
- можаронинг глобал иқтисодиётга салбий таъсирини минималлаштириш ва глобал саноат таъминот занжирларининг барқарорлигини бузмаслик.
Украина президенти Владимир Зеленскийнинг тинчлик режаси рус қўшинларини олиб чиқиб кетиш, 1991 йилдаги чегараларини тиклаш ва Россияни ҳаракатлари учун жавобгарликка тортишни назарда тутади. Бироқ Москва ҳудудий даъвоси сабабли мазкур режага рози бўлмаган.
Путин 16—17 май кунлари стратегик ҳамкорлик борасида учрашув ўтказиш учун Хитойга боради. Бу ташриф Россия президентининг сайловдаги ғалабасидан кейинги илк хорижий сафари бўлади. Россия ҳукумати ушбу сафардан катта мақсадларни кўзлагани хабар қилинган.
Изоҳ (0)