Хитой G20 саммити олдидан Украинага нисбатан позициясини ўзгартирди — ОАВ

G20 саммити арафасида музокараларда иштирок этаётган Хитой вакиллари Украинадаги урушга нисбатан нейтрал позициясини ўзгартирди. Бу ҳақда юқори мартабали француз расмийсига таяниб, Bloomberg хабар берди.

“Хитой илгари амал қилган нейтрал позиция Москва учун фойдали эди. Бироқ ўтган йилга нисбатан Пекин Украинага нисбатан мослашувчанроқ позицияни эгаллади”, — деди аноним амалдор.

Таъкидланишича, бу Ғарб давлатлари танлаган позицияни ҳисобга олган ҳолда муҳим нуқта бўлиб, Хитойни урушни тўхтатиш учун Россияга босим ўтказишга чақиради.

Франция расмийсига кўра, G20 аъзолигига кирувчи барча давлатлар Украинадаги уруш бўйича умумий тилга келишиб олган. Шунга қарамай, саммитга мезбонлик қилаётган Ҳиндистон ҳамон Россиянинг Украинага ҳужумини “қоралашдан бош тортмоқда”.

Путин ва Си Цзиньпин саммитда қатнашмайди

G20 саммити 9—10 сентябрь кунлари Нью-Деҳлида бўлиб ўтади. Россия президенти Владимир Путин саммитда қатнашмайди. Россия томонидан ташқи ишлар вазири Сергей Лавров иштирок этади. Хитой етакчиси Си Цзиньпин ҳам тадбирда қатнашмайди. Унинг ўрнига саммитда Хитой халқ республикаси давлат кенгаши бош вазири Ли Цян иштирок этади.