Россия президенти Владимир Путиннинг Хитойга ташрифи ҳар икки давлат томонидан тинчлик саъй-ҳаракатларини мувофиқлаштириш сифатида тақдим этилмоқда, аммо аслида Пекин ва Москва Ғарбга қарши туришга тайёрланмоқда. Бу ҳақда икки давлат етакчиларининг баёнотларини таҳлил қилиб, The Telegraph хабар берди.
Ёпиқ эшиклар ортидаги музокаралар олдидан камерага берган изоҳларида икки етакчи глобал барқарорлик ва Украинадаги уруш каби конфликтларни ҳал қилиш борасида гапирди. Аммо улар 16 май куни эрталаб музокаралар олиб бориш учун столга ўтирганларида, гап фақат тинчлик ҳақида кетмади, — дейилади хабарда.
Путинга Хитойда янги мудофаа вазири Андрей Белоусов, Россия Хавфсизлик кенгашига котиби этиб тайинланган Сергей Шойгу, “Росатом” ва “Роскомос” раҳбарлари ҳамроҳлик қилмоқда. Таҳлилчилар фикрича, бу давлатлар ўртасидаги ҳарбий ҳамкорлик кучайганидан далолат беради.
АҚШ бошчилигидаги дунё тартибини ўзгартириш учун Путин ва жаноб Си “чегарасиз” биргаликда ҳамкорлик қилишга тайёр эканликларини яширишмади, — деб ёзмоқда The Telegraph.
Шунингдек, нашр Хитой Россиянинг Украинага қарши ҳужумини қоралашдан бош тортгани ва Россия ҳарбий-саноат комплексини икки томонлама технологиялар билан таъминлаётганини таъкидламоқда.
Путин Хитойга ташрифи арафасида бу учрашув “стратегик шериклик” доирасида “мамлакатларимизнинг ҳудудий яхлитлиги ва хавфсизлигини” мустаҳкамлаш бўйича биргаликдаги саъй-ҳаракатларга ёрдам беради, деганди.
Бу ҳарбий ва геосиёсий ҳамкорлик учун нимани англатишига келсак, икки раҳбар, эҳтимол, Ғарбни ўйлантиришда давом этади, — дея хулоса қилади тҳе Telegraph.
Эслатиб ўтамиз:
- Россия президенти 16 май куни расмий ташриф билан Пекинга ташриф буюриб, Хитой раиси билан учрашди.
- Икки томонлама музокаралар чоғида савдо-иқтисодий ҳамкорликни ривожлантириш ва кенгайтириш масалаларига эътибор қаратиш режалаштирилганди.
- Учрашувда Путин ва Си Цзиньпин энг долзарб сиёсий ҳамда минтақавий масалаларга ҳам тўхталиб ўтган.
Хитойга давлат ташрифининг иккинчи босқичи 17 май куни Харбинда бўлиб ўтади. У ерда Путин VIII Россия—Хитой кўргазмаси ва Минтақалараро ҳамкорлик бўйича IV Россия—Хитой форумининг очилиш маросимида иштирок этади, Харбин политехника университети талабалари ва ўқитувчилари билан учрашади.
Изоҳ (0)