Агар АҚШ ва Европа иттифоқи савдо урушини бошласа, ягона ғолиб Хитой бўлади.
Бу ҳақда ЕИ дипломатияси раҳбари Кая Каллас Брюсселда бўлиб ўтаётган Евроиттифоқ саммитида айтиб ўтди.
Унинг сўзларига кўра, Европа иттифоқи ҳам, АҚШ ҳам савдо урушидан манфаатдор эмас.
“Агар биз АҚШ билан савдо урушини бошласак, бу америкаликлар учун ҳам фойдали бўлмайди. Бу урушда қайси давлат ғолиб бўлишини аниқ айта оламан. Бу — Хитой”, деди Кая Каллас.
Аввалроқ The Washington Post газетаси АҚШнинг сайланган президенти Дональд Трамп жорий қилмоқчи бўлган тарифлар Европа иттифоқи мамлакатларига жиддий иқтисодий зарар етказиши мумкинлиги ҳақида хабар берган эди.
“Бу ҳаракатлар Европа иттифоқи ва АҚШ ўртасидаги муносабатларга салбий таъсир қилади”, деб ёзди The Washington Post.
Шу билан бирга, Европа Марказий банки раҳбари Кристин Лагард Европа етакчилари Трамп бошчилигидаги янги Америка маъмурияти билан божлар бўйича ҳамкорлик қилиши, шунингдек, савдо урушига йўл қўймаслик учун Қўшма Штатларда ишлаб чиқарилган маҳсулотларни кўпроқ сотиб олиши керак, деган фикрни билдирганди.
Аввалроқ CBS News Дональд Трамп Хитой раиси Си Цзиньпинни 2025 йил 20 январга мўлжалланган инаугурация маросимига таклиф қилгани ҳақида хабар берганди.
Аммо кейинроқ мазкур телеканал Си Цзиньпин Трампнинг инаугурация маросимида қатнашмасликка қарор қилганини билдирди.
Инаугурацияга одатда элчилар ва бошқа дипломатлар таклиф қилинади, аммо давлат департаментининг 1874 йилга оид ёзувлари хорижий етакчилар ҳеч қачон ҳокимиятни топшириш маросимида иштирок этмаганидан далолат беради, дейилади хабарда.
Изоҳ (0)