АҚШнинг сайланган президенти Дональд Трамп маслаҳатчиларига инаугурациядан кейинги дастлабки 100 кун ичида Хитойга ташриф буюриш истагини билдирди. Бу ҳақда муҳокамалардан хабардор шахсларга таяниб, The Wall Street Journal хабар берди.
Ташриф сайланган президентнинг Хитой импортига юқори божхона тўловларини жорий этиш таҳдиди фонида “Си Цзиньпин билан муносабатларни чуқурлаштириш мақсадида” режалаштирилмоқда. Ҳозирча бу борада якуний қарор қабул қилинмаган. Трамп охирги марта Пекинга 2017 йилда, биринчи президентлик муддати бошланганидан деярли бир йил ўтгач ташриф буюрганди.
Трампнинг инаугурацияси 20 январь куни бўлиб ўтади. Унда Хитой раисининг ўринбосари Хан Чжен иштирок этади. Дастлаб тадбирга шахсан Си Цзиньпиннинг ўзи таклиф қилинган. Икки давлат етакчилари 17 январь куни телефон орқали суҳбатлашган.
WSJ маълумотларига кўра, сиёсатчилар ўз вакиллари орқали шахсий учрашувни муҳокама қилган. Хусусан, вариантлардан бирига кўра, Трамп Хитой раҳбарини АҚШга таклиф қилиши мумкин.
АҚШ ва Хитой муносабатлари
Икки давлатнинг муносабатлари кескинлигича қолмоқда. Хусусан, АҚШ Хитойни юқори мартабали сиёсатчиларини кузатаётганликда айбламоқда. Хитой ҳукумати бунга, жумладан, хакерлик ҳужумларига алоқадорлигини қатъиян рад этмоқда.
Ноябрь ойининг охирида Трамп Канада, Мексика ва Хитойдан келтирилаётган товарларга божхона тўловлари оширилишини айтиб, бундай фармонни давлат раҳбари лавозимида бўлган биринчи кунидаёқ имзолашга ваъда берганди.
У Хитой маҳсулотларига 10 фоиз миқдорида қўшимча тариф ставкаси жорий этилишини айтган ва ХХР ҳукуматини гиёҳванд моддалар контрабандасига қарши етарли чоралар кўрмаётганликда айблаган.
Трампнинг айтишича, у Хитой ҳукумати вакиллари билан учрашувларда бу масалани бир неча бор кўтарган, улар чоралар кўришга ваъда берган, аммо буни амалга оширмаган. WSJ газетаси ёзишича, яна бир “потенциал низоли масала” Тайван бўлиб, Пекин уни ўз ҳудуди деб ҳисоблайди.
“Яқинда бўлиб ўтган телефон суҳбатида Си Цзиньпин Трампга орол масаласини эҳтиёткорлик билан ҳал қилиш зарурлигини эслатиб, уни миллий суверенитет муаммоси деб атаган”, дейилади хабарда.
Изоҳ (0)