Москва ва Пекин глобал тинчликни таъминлаш ҳамда умумий ривожланишни рағбатлантиришда муҳим куч сифатида иш олиб бормоқда. Бу ҳақда Хитой ташқи ишлар вазири Цинь Ган Россия Халқаро ишлар кенгаши ва Хитой Ижтимоий фанлар академияси томонидан 26–27 июнь кунлари ташкил этилган “Россия ва Хитой: янги даврда ҳамкорлик” номли VIII халқаро конференцияси иштирокчиларига йўллаган видеомурожаатида айтиб ўтди.
“Хитой ва Россия Бирлашган Миллатлар Ташкилоти Хавфсизлик Кенгашининг доимий аъзолари бўлиб, глобал тинчлик ва тараққиётни таъминловчи муҳим барқарорлаштирувчи кучдир”, — деди Цинь Ган.
БМТ Хавфсизлик Кенгашининг доимий аъзолари сафида АҚШ, Буюк Британия ва Франция ҳам бор.
Ўз навбатида, Россия ташқи ишлар вазири Сергей Лавров Москва ва Пекин дунёга Ғарбнинг глобал ҳукмронлик сиёсатига конструктив альтернатив таклиф этишини ҳамда “барча давлатларнинг манфаатларини, барча халқларнинг маданий ва цивилизациявий ўзига хослигини ҳисобга олган ҳолда, кўп қутбли дунё учун шарт-шароитларни шакллантиришга” ҳисса қўшишини айтди.
Март ойида Россия президенти Владимир Путин Хитой раҳбари Си Цзиньпин билан музокаралар ўтказган эди. Шундан сўнг икки давлат раҳбарларининг қўшма баёнотида ўзаро муносабатлар янги даврга қадам қўяётгани, мамлакатлар бир-бирини устувор шериклар сифатида кўриб, тенг ҳуқуқли ҳамкорлик қилаётгани таъкидланди.
Изоҳ (0)