АҚШ расмийлари Россия ва Хитой халқаро тартибни бузишга интилаётганига ишончи комил, деди Миллий хавфсизлик кенгашининг стратегик алоқалар бўйича координатори Жон Кирби. Унинг сўзларига кўра, Вашингтон Москва ва Пекин муносабатларининг мустаҳкамланишидан хавотирда.
Жон Кирбининг таъкидлашича, ушбу давлатлар “Қўшма Штатларга фойда келтирадиган иттифоқчилар ва ҳамкорликлар тармоғига қарши чиқишга” интилмоқда. Унинг фикрича, Россия Федерацияси ва Хитой “миллий хавфсизлик соҳасида бир-бирининг манфаатларини мустаҳкамлаш йўлларини изламоқчи”.
“Бу икки давлат ва уларнинг раҳбарлари бутун дунё бўйлаб бизнинг миллий хавфсизлик манфаатларимизга зид бўлган ҳаракатларни амалга оширмоқда. Бу ҳаракатлар кўплаб иттифоқчиларимиз ва ҳамкорларимиз манфаатларига ҳам зиддир. Бу икки етакчи ривожланаётган муносабатларни мустаҳкамлашга ҳаракат қилишда давом этишса ажаб эмас”, — деди Жон Кирби брифингда.
Россия президенти Владимир Путин шу ҳафта Хитойга икки кунлик ташриф билан келди. У Хитой раҳбари Си Цзиньпин билан ҳам учрашди. Улар Украинадаги вазиятни юзма-юз муҳокама қилишди, шунингдек, Швейцарияда 15—16 июнь кунлари бўлиб ўтиши режалаштирилган тинчлик конференцияси ҳақида фикр алмашишди. Мазкур тадбирга Россия таклиф қилинмаган, Хитой раҳбарининг иштирок этиши эса ҳозирча номаълум.
Изоҳ (0)