Америка Қўшма Штатлари Швейцарияда бўлиб ўтадиган Украина бўйича тинчлик саммитида иштирок этади. Бу ҳақда Reuters хабар берди.
АҚШ расмийси мамлакат саммитда иштирок этишини айтиб, бироқ айнан ким ва қайси даражадаги шахс эканини очиқламаган.
Май ойи бошида Швейцария ТИВ конференция саналарини тасдиқлаган. Украина бўйича тинчлик саммити 15–16 июнь кунлари Швейцариянинг Бургеншток шаҳрида ўтказилиши режалаштирилган. G7, G20, БРИКС мамлакатлари, хусусан, 160 та давлат делегациялари таклиф қилинган.
Россия саммитга таклиф қилинмаган. Россия томони агар таклиф қилинса ҳам, иштирок этмаслигини маълум қилган. Швейцария ТИВ Россия саммитда иштирок этиши муҳимлигини таъкидлаган.
Хитой конференцияда иштирок этиши ҳақида аниқ маълумот бермаган. Аввалроқ Германия канцлери Олаф Шольц Хитой президенти Си Цзиньпин Швейцария саммитини қўллаб-қувватлаганини айтган эди. Шундан сўнг Хитой ТИВ мамлакат ҳар қандай тинчлик ташаббусларини қўллаб-қувватлашини маълум қилган. Бироқ Хитойга кўра, Москва ва Киев можароси икки мамлакатнинг тўғридан тўғри музокаралари билан якунланиши керак.
Изоҳ (0)