Статистика агентлиги 2024 йилдаги Ўзбекистон экспорт-импорт операциялари ҳажмини маълум қилди. Ҳисоботдан қатор муҳим маълумотлар ўрин олган.
Ташқи савдо дефицити қисқарган
2024 йилда Ўзбекистон ташқи савдо айланмаси (ЦА) ҳажми 65,93 млрд долларни ташкил этди (2023 йилгидан 3,8 фоиз ўсди). Шундан экспорт улуши 26,94 млрд доллар (8,4 фоиз ошди), импорт 38,98 млрд доллар (0,8 фоиз кўпайди) бўлди. Тақчиллик — 12 млрд доллар (2023 йилда 13,8 млрд доллар).
Ўтган йили Хитой мамлакат ташқи савдосида энг кўп улушни (12,5 млрд доллар, умумий ҳажининг 18,9 фоизи) эгаллади. Ўзбекистон мазкур давлатга 2 млрд долларлик товар ва хизматлар экспорт қилган бўлса, қарийб 10,4 млрд долларлик маҳсулотлар импорт қилган.
Кейинги ўринни Россия эгаллаган. Руслар билан 3,7 млрд долларлик экспорт, 7,94 млрд долларлик импорт операциялари амалга оширилган.
Шу билан бирга, ташқи савдода яна 8 та давлат улуши юқори:
- Қозоғистон—4,3 млрд доллар;
- Туркия — 2,9 млрд доллар;
- Корея — 2 млрд доллар;
- Германия —1,2 млрд доллар;
- Туркманистон — 1,1 млрд доллар;
- Афғонистон — 1,1 млрд доллар;
- Франция — 1,1 млрд доллар;
- Ҳиндистон — 980 млрд доллар.
Ўтган йилги Ўзбекистон ташқи савдосида Қирғизистон асосий ўнталикдан тушиб қолган. Унинг ўрнини Ҳиндистон эгаллаган.
Газ экспорти кўпайиб, олтинники камайган
2024 йилда Ўзбекистон экспортининг энг катта улушини (27,8 фоиз) олтин ташкил этган. Мамлакат ўтган йили хорижга 7,5 млрд долларлик (2023 йилда 8,1 млрд доллар) қимматбаҳо металл сотган.
Хизматлар экспорти ҳажми 7,2 млрд долларни ёки жами экспорт ҳажмининг 26,7 фоизини ташкил этиб, 2023 йилдагидан (5,6 млрд доллар) 27,7 фоизга кўпайди. Хизматлар экспорти таркибининг асосий улуши сафарлар (туризм) (48,8 фиоз) ва транспорт (35,7 фоиз) ташкил этган.
Ўз навбатида 4,2 млрд долларлик саноат товарлари, 2,2 млрд долларлик озиқ-овқат маҳсулотлари ва тирик ҳайвонлар экспорт қилинган. Шунингдек, чет элга 1,2 млрд долларлик машиналар ва транспорт асбоб-ускуналар сотилган.
Пресс-релизда эътиборга молик маълумотлардан бири газ экспорти билан боғлиқ. Мамлакатда табиий газ қазиб олиш ҳажми кескин қисқариши ва тақчилликка қарамай, мазкур маҳсулотни экспорт қилиш тўхтатилмаган. 2024 йилда Ўзбекистон хорижга 627,6 млн долларлик, яъни 2023 йилдагидан 18,4 фоиз кўпроқ газ сотган.
Умуман олганда, республика товар ва хизматларининг энг кўп экспортни Россия (13,7 фоиз), Хитой (7,6 фоиз), Қозоғистон (5,4 фоиз) давлатларига амалга оширилган.
Рекорд даражадаги газ импорти
2024- йил январь декабрь ойларида импорт қилинган товарлар ҳажми 2023 йилдагидан 337 млн долларга камайган. Ўтган йили импорт таркибининг энг катта улушини машиналар ва транспорт асбоб-ускуналари ташкил этган. Яъни йил давомида хориждан 13,3 млрд долларлик шундай товарлар сотиб олинган (2023 йилда 14,9 млрд доллар).
Шу билан бирга, саноат товарлари улуши ҳам нисбатан юқори сақланиб қолган 6 млрд доллар (15,5 фоиз). Ўз навбатида чет элдан 3,7 млрд долларлик хизматлар, 3,7 млрд долларлик озиқ-овқат маҳсулотлари ва тирик ҳайвонлар сотиб олинган.
Ўтган йили 3,9 млрд долларлик минерал ёқилғи, ёғлаш мойлари ва шунга ўхшаш материаллар импорт қилинган. Табиий газ ҳам мазкур таркибга киради. 2024 йилда Ўзбекистон 1,7 млрд долларлик — тарихда кузатилмаган рекорд қийматдаги газ импорт қилди.
Яна бир эътиборни тортадиган рақамлардан бири Ўзбекистонга автомобиллар импорти ҳажми кескин камайгани билан боғлиқ. Мамлакат 2024 йилда 3,3 млрд долларлик автомобиль импорт қилган, бу кўрсаткич 2023 йилда 4,5 млрд долларга етганди. Ўтган йили 2 мрд долларлик электр машиналари, аппаратлари ва жиҳозлари ва уларнинг электр қисмлари импорт қилинган (2023 йилда 1,9 млрд доллар).
Мамлакат энг кўп — 10,4 млрд долларлик импортни Хитойдан амалга оширган. Шу билан бирга, Россия (7,9 млрд доллар), Қозоғистон (2,8 млрд доллар), Корея (1,9 млрд доллар) ва Туркиядан (1,7 млрд доллар) нисбатан кўп товар ва хизматларни импорт қилган.
Изоҳ (0)