Қозоғистон картошка экспортига чеклов қўйгани сабаб Ўзбекистонда картошка нархи сезиларли даражада ошиши мумкинлиги ҳақида хабарлар тарқалади. Қишлоқ хўжалиги вазирлиги бунга муносабат билдирди.
Унда айтилишича, Ўзбекистон аҳолисининг картошкага бўлган йиллик талаби 4 миллион тоннани ташкил этади. 2024 йилда мамлакатда жами 3,7 миллион тонна, шундан асосий майдонда 2,7 миллион тонна ва такрорий экин сифатида 1 миллион тонна картошка етиштирилган. Мазкур ҳосилнинг 600 минг тоннаси кейинги мавсумда экиш учун уруғлик сифатида захира қилинган ва табиий йўқотиш 100 минг тонна (3 фоиз) атрофида белгиланган.
2024—2025 йил қиш ва баҳор мавсуми учун маҳаллий ҳокимликлар томонидан жалб қилинган тайёрлов корхоналари томонидан 245,5 минг тонна картошка захирага жамғарилган ва фсп.агро.уз онлайн платформаси орқали субъектлар кесимида мониторинг йўлга қўйилган.
“Захирага жамғарилган маҳсулотни ички истеъмол бозорига чиқариш бўйича Иқтисодиёт ва молия вазирлиги томонидан ҳар 10 кунлик тармоқ жадвали ҳудудлар кесимида тасдиқланиб, ижросини таъминлаш бўйича Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига юборилган”, дейилади вазирлик хабарида.
2025 йил 20 январь ҳолатига маҳаллий ҳокимликлар томонидан жалб қилинган тайёрлов корхоналари томонидан жами 6,3 минг тонна картошка ички бозорларга савдога чиқарилган, захира қолдиғи 239,2 минг тоннани ташкил қилади. 2024 йилда 703 минг тонна, шундан декабрь ойида 74,4 минг тонна картошка импорт қилинган.
Вазирлик хабарида таъкидланишича, Ўзбекистонга картошка импорти фақат Қозоғистон Республикасига боғланиб қолмаган. Мамлакатда қишлоқ хўжалиги маҳсулотларини диверсификация қилиш, озиқ-овқат хавфсизлигини таъминлаш юзасидан олиб борилаётган ишлар самараси туфайли айни пайтда қўшни Қозоғистондан ташқари Покистон, Қирғизистон, Афғонистондан ҳам картошка импорт қилиш йўлга қўйилган.
Хусусан, мамлакатда картошка етишмовчилигининг олдини олиш ва ўз вақтида зарур чора-тадбирлар кўриш учун 2024 йил 6—11 декабрь кунлари Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги раҳбарлигида Ўзбекистон делегацияси Эрон ва Покистонга юборилди. Ташриф давомида эришилган келишувга мувофиқ, 2025 йил январь – май ойларида Ўзбекистонга Эрондан 100 минг тонна ва Покистондан 100 минг тонна жами 200 минг тонна картошка етказиб берилади.
Бундан ташқари, Сурхондарё вилоятидаги дала майдонларида етиштирилаётган картошка ҳосили март ойининг иккинчи ярми ва апрель ойларида тўлиқ мамлакат бозорларига чиқарилади.
Ички бозорни картошка билан таъминлаш ҳамда нарх барқарорлигини сақлаш учун қуйидагилар амалга оширилади:
- Иқтисодиёт ва молия вазирлиги, Қишлоқ хўжалиги вазирлиги, Қорақалпоғистон Республикаси Вазирлар кенгаши ва вилоятлар ҳокимликлари билан бирга тайёрлов корхоналарида захира қилинган картошка ҳисобидан 239,2 минг тонна маҳсулотни график асосида ҳар 10 кунда 15-25 минг тоннагача миқдорда ички бозорга тизимли чиқарилади;
- Карантин агентлиги томонидан импортёр тадбиркорлар билан Покистондан ва Эрондан 100 минг тоннадан ҳамда Афғонистондан фитосанитар талабларга мувофиқ қўшимча картошка олиб келиш ташкил этилади;
- Сурхондарё вилоятида январь ойида 7,5 минг гектар ҳамда февраль ойида барча вилоятларда (Қорақалпоғистон Республикаси ва Хоразм вилоятидан ташқари) 28,5 минг гектар майдонда картошка экилиб, апрель ойида 70 минг тонна, май ойида 450 минг тонна ҳосил етиштирилиб, ички бозорга йўналтирилади ва аҳоли талаби тўлиқ таъминланади.
“Юқоридагилардан келиб чиқиб, юртдошларимиздан мамлакатимизда картошка нархи ошиши ҳақидаги бир томонлама олинган маълумотлардан фойдаланган ҳолда тарқатилаётган хабарларга алданиб қолмасликларини сўраймиз”, дейилади вазирлик хабарида.
Қозоғистоннинг бир қанча ҳудудларида картошка нархи кескин ошиб кетгани сабаб ҳукумат учинчи мамлакатларга, хусусан, Ўзбекистонга унинг экспортини олти ойга чеклаганди.
“Қўшни давлатлар, хусусан, Ўзбекистон томонидан талаб ошгани ва экспорт нархлари юқорилиги сабабли жорий йилда картошка экспорти 1,5 баробар ошиб, 411 минг тоннадан 605 минг тоннага етди. Кучли талаб ички бозорга ҳам таъсир кўрсатди”, дейилади ҳукумат хабарида.
Қозоғистонда картошканинг бир килоси 400 тенгегача (9,5 минг сўмдан зиёд) ва ундан юқори сотилмоқда.
Изоҳ (0)