Ўзбекистонга 2024 йили кириб келган пул ўтказмалари миқдори 14,8 млрд долларни ташкил қилди. Бу ҳақда Марказий банкнинг “Жисмоний шахсларнинг валюта операциялари бўйича қисқача шарҳи”да маълум қилинди.
Қайд этилишича, ушбу кўрсаткич 2023 йилга нисбатан 30 фоизга ёки 3,4 млрд долларга кўп.
Шарҳга кўра, маблағларнинг 77 фоизи Россиядан (11,5 млрд доллар) келиб тушган бўлиб, 2023 йилга нисбатан 29 фоизга ошган. Мазкур трансфертларнинг қолган қисми Қозоғистон (795 млн доллар), АҚШ (577 млн доллар), Жанубий Корея (534 млн доллар), Туркия (405 млн доллар), Буюк Британия (135 млн доллар) ва бошқа мамлакатлардан ўтказилган.
Энг кўп ўтказмалар июлда (1 млрд 785 млн доллар) амалга оширилган бўлса, энг ками февралда (738 млн доллар) ўтказилган.
Ўзбекистонга 2024 йили келиб тушган трансчегаравий пул ўтказмалари ҳажмида 2023 йилга нисбатан Буюк Британиядан 83 фоиз, Жанубий Кореядан 56 фоиз, АҚШдан 35 фоиз ҳамда Европа иттифоқи мамлакатларидан 32 фоиз ўсиш кузатилган.
Ушбу даврда жисмоний шахсларга келиб тушган маблағларнинг 8,2 млрд доллари анъанавий халқаро пул ўтказма тизимлари орқали (2023 йилга нисбатан ўсиш 14 фоиз), 5,9 млрд доллари хориждан жисмоний шахсларнинг банк карталарига тўғридан тўғри (P2P) ўтказмалари орқали (ўсиш 51 фоиз) ҳамда 774 млн доллари банк ўтказмаси (SWIFT) орқали (ўсиш 2,1 баробар) амалга оширилган.
Шунингдек, 2024 йилда Ўзбекистондан чет элга юборилган пул ўтказмалари ҳажми 2,8 млрд долларни (2023 йилга нисбатан ўсиш 19 фоиз) ташкил қилган.
Изоҳ (0)