Тошкент вилоятининг Тошкент туманида жойлашган “Навоий” чегара божхона пости (Зангиота чегара ўтказиш пункти) 27 январдан синов режимида иш бошлади. Бу ҳақда Божхона қўмитаси матбуот хизмати хабар берди.
Маълум қилинишича, божхона постида автобус ва енгил автомашиналар ҳамда уларда ҳаракатланаётган йўловчилар учун алоҳида йўлаклар ташкил этилган.
Божхона постига туташ ҳудудда бир вақтда 500 дан ортиқ машиналар ва 100 дан ортиқ автобусларни қабул қилиш имкониятига эга автотураргоҳ барпо этилди. Унда халқаро йўналишда ҳаракатланаётган автобус ва енгил автомашиналар, шунингдек, маҳаллий йўналишдаги йўналишли жамоат транспортлари ҳамда такси хизматлари йўлга қўйилган.
“Автотураргоҳда транспорт воситалари учун кутиш жойлари, фуқаролар учун тез тайёр бўлувчи тамаддихоналар, кафе ва бошқа маиший ва ижтимоий хизматлар, бундан ташқари, халқаро йўналишдаги автотранспорт воситалари учун шаффоф электрон навбат тизими йўлга қўйилади”, дейилади хабарда.
2022 йилнинг октябрь ойида Қозоғистон ва Ўзбекистон чегарасидаги Зангиота—Қоплонбек автойўл ўтказиш пункти 19 ойга ёпилиши ҳақида хабар берилганди.
Аввалроқ Ўзбекистон—Қозоғистон чегарасидаги “Довуд ота” постидан ҳаракатланиш 1 февралдан бошлаб уч ойга тўхтатилиши ҳақида хабар берилди.
Изоҳ (0)