Қозоғистонлик депутат Сергей Пономарев мамлакатдаги ҳар қандай масалани пулга ҳал қилиш мумкинлигини айтди. Бу ҳақда Tengrinews хабар берди.
Қонунчилик палатасида коррупцияга қарши курашиш масалалари бўйича қонун лойиҳаси кўриб чиқилди. Муҳокама чоғида Пономарев қозоғистонликлар маиший коррупцияга тез-тез дуч келишини айтди.
Мамлакатимизда ҳар қандай масалани пул билан ҳал қилиш мумкин. Олий ўқув юртларида ўқитувчилар яхши баҳо учун пора сўрайди. Поликлиникаларда шифокорлар сифатли даволаш учун ҳақ талаб қилади. Ҳатто банк соҳасида ҳам кредит олиш учун, айниқса имтиёзли кредит бўлса, пул беришга тўғри келади.
Қонун лойиҳасида давлат хизматчиси бўлмаган ҳар қандай шахсга ноқонуний мукофот берганлик учун жиноий жавобгарлик жорий этиш таклиф қилинмоқда. Мантиқан, ноқонуний мукофот олувчи ҳам, уни берувчи ҳам жавобгарликка тортилиши керак. Аммо бундай ҳолатда қаҳвахонадаги чойчақаларни ҳам жиноят сифатида кўрсатиш мумкин. Чойчақа бердингми — пора учун қамалдинг, деди Пономарев.
Мажлис депутатлари коррупцияга қарши курашишга қаратилган қонун лойиҳасини биринчи ўқишда маъқуллади. Ҳужжат пора олишни талаб қилиш, ваъда бериш ёки таклиф қилиш учун жиноий жавобгарликни назарда тутади. Коррупцияга қарши сиёсатни тартибга солувчи Жиноят кодекси, Маъмурий ҳуқуқбузарликлар тўғрисидаги кодекс ва бошқа бир қатор қонунларга тегишли тузатишлар киритилади.
Бундай ёндашув келишув босқичидаёқ коррупциявий хатти-ҳаракатларнинг олдини олиш имконини беради, деб ҳисоблайди расмийлар.
Бундан ташқари, коррупцияга оид жиноятларда иштирок этганлик учун юридик шахсларнинг жавобгарлиги кучайтирилмоқда. Белгиланган жарималар ўрнига, унинг миқдорига қараб, пора суммасининг 30 бараваридан 60 бараваригача миқдорда жарималар жорий этилади.
Ўзбекистонда март ойида коррупцияга қарши курашиш бўйича 2030 йилгача мўлжалланган Миллий стратегия ишлаб чиқилган. Миллий стратегияни 2024—2025 йилларда амалга ошириш бўйича йўл харитасида 7 та йўналишда коррупцияга қарши курашиш механизмларини такомиллаштириш бўйича чора-тадбирлар белгиланган.
2024 йил декабрида ўтказилган тадқиқотда жамоатчилик ва ҳукуматнинг коррупцияга муносабати баҳоланганди. Тадқиқот натижаларига кўра, жамоатчилик кўпинча коррупцияни порахўрлик ва қариндош-уруғчилик деб тушунади. 50 фоиздан ортиқ респондентга кўра, коррупция — бу мансабни суиистеъмол қилиш ва қариндош-уруғчилик, 40 фоиздан камроғи учун эса қимматбаҳо совғалар беришдир. Респондентлар коррупция кенг тарқалган соҳалар сифатида соғлиқни сақлаш, таълим (айниқса, олий таълим) ва маҳаллий ҳокимиятни эътироф этган. Ўзбекистонда раҳбарлик лавозимидаги 500 кишининг коррупцияга мойиллигини баҳолаш режалаштирилган.
Изоҳ (0)